 சாம்ராஜ்நகரின், சன்னேகாலா கிராமத்தின் ஓட்டுச்சாவடியில் நேற்று காலை ஓட்டு போட வாக்காளர்கள் வரிசையில் நின்றிருந்தனர். அப்போது இந்திய தேசிய பறவையான மயில், ஓட்டுச்சாவடிக்கு வந்தது. சிறிது நேரம் வாக்காளர்களை நோட்டம் விட்டு, அங்கும், இங்கும் நடமாடிய பின் அங்கிருந்து பறந்து சென்றது.

 சாம்ராஜ்நகரின், ராமசமுத்ராவில் அமைக்கப்பட்ட ஓட்டுச்சாவடியில் கலைஞர்கள் தம்புரா, மத்தளம், தம்பட்டை வாத்தியங்கள் வாசித்து, வாக்காளர்களை வரவேற்று அழைத்து சென்றனர். இது வாக்காளர்களின் உற்சாகத்தை அதிகரித்தது.

 துமகூரின் திப்டூரை சேர்ந்த டாக்டர் ஸ்ரீதர், இங்குள்ள ஓட்டுச்சாவடிக்கு குதிரையில் ஏறி வந்து ஓட்டு போட்டது, அனைவரையும் கவர்ந்தது.

 சித்ரதுர்கா லோக்சபா தொகுதிக்கு உட்பட்ட செல்லகரேயின் ஹெட்பனஹள்ளி ஓட்டு சாவடியில் தேர்தல் பணியில் உதவி மக்கள் தொடர்பு அதிகாரி யசோதம்மா, 55 ஈடுபட்டிருந்தார். அப்போது அவருக்கு திடீரென உடல்நலக் குறைவு ஏற்பட்டது. உடனடியாக மருத்துவமனைக்கு அழைத்து சென்றும், சிகிச்சை பலனின்றி உயிரிழந்தார்.

 துமகூரு நகர் எஸ்.எஸ்.புரத்தை சேர்ந்தவர் ரமேஷ், 54. துணி வியாபாரம் செய்து வரும் இவர், நேற்று காலை தனது மனைவியுடன் ஓட்டு போட்டு விட்டு வீடு திரும்பினார். சிறிது நேரத்தில் அவருக்கு மாரடைப்பு ஏற்பட்டது. உடனடியாக மருத்துவமனைக்கு கொண்டு சென்றும், உயிரிழந்தார்.