'மஹாதேவ்' சூதாட்ட செயலி ஐ.பி.எல்., எனப்படும் இந்தியன் பிரீமியர் லீக் கிரிக்கெட் போட்டிகளின் போது சூதாட்டத்தில் ஈடுபட்டு பல கோடி ரூபாய் பணத்தை சட்டவிரோதமாக பரிமாற்றம் செய்ததாக குற்றச்சாட்டு எழுந்தது. இந்த விவகாரத்தை மத்திய விசாரணை அமைப்புகள் தீவிரமாக விசாரித்து வருகின்றன.

கடந்த ஆண்டு ஒளிபரப்பான ஐ.பி.எல்., கிரிக்கெட்டில் சில போட்டிகள், மஹாதேவ் செயலியில் சட்டவிரோதமாக நேரலை யில் ஒளிபரப்பானது. இது தொடர்பாக அளிக்கப்பட்ட புகாரை மஹாராஷ்டிரா சைபர் பிரிவு போலீசார் விசாரித்து வருகின்றனர்.

இந்த நேரலை ஒளிபரப்பு தொடர்பாக செயலியை நடத்தும் நிறுவனம் பல விளம்பரங்களை வெளியிட்டது. அதில், பல பாலிவுட் நட்சத்திரங்கள் நடித்தனர்.

அந்த வகையில், நடிகர் சஞ்சய் தத், நடிகை ஜாக்குலின் பெர்னாண்டஸ் ஆகியோரின் மேலாளர்களிடம் போலீசார் ஏற்கனவே விசாரணை நடத்தினர்.

ஹிந்தி, தமிழ் சினிமாக்களில் கதாநாயகியாக நடித்து வரும் தமன்னா, இந்த விளம்பரங்களில் நடித்துள்ளார்.

இது தொடர்பாக அவரிடம் விசாரணை நடத்த சைபர் பிரிவு போலீசார் சம்மன் அனுப்பி உள்ளனர். வரும் 29ல் மும்பையில் உள்ள சைபர் பிரிவு அலுவலகத்தில் ஆஜராகும்படி சம்மனில் குறிப்பிடப்பட்டுள்ளது.