கர்நாடகாவில் கே.எம்.எப்., எனப்படும் கர்நாடகா பால் கூட்டமைப்பின் கீழ், 15 கூட்டுறவு பால் உற்பத்தியாளர்கள் சங்கங்கள் உள்ளன. தினமும் 82 லட்சம் லிட்டர் பால் சேகரிக்கப்படுகிறது. இதில், 52 லட்சம் லிட்டர் பால் பாக்கெட்டுகளாகவும்; 12.50 லட்சம் லிட்டர் தயிர் பாக்கெட்டுகளாகவும் 1.50 லட்சம் லிட்டர் மோர் பாக்கெட்டுகளாவும் விற்பனை செய்யப்படுகிறது.

இதுவரை 40 - 45 லட்சம் லிட்டர் பால் மட்டுமே விற்பனையாகி வந்தது. தற்போது 52 லட்சம் லிட்டர் விற்பனையாவது கர்நாடகா வரலாற்றில் இதுவே முதன் முறை.

தற்போது கர்நாடகாவில் வாட்டி வதைக்கும் வெயிலால் பொது மக்கள் அல்லல்படுகின்றனர். பலரும் பனை நுங்கு, இளநீர், ஜூஸ் சென்டர்களை நோக்கி படையெடுக்க துவங்கி உள்ளனர். இத்துடன், பால், தயிர், மோர் வாங்குவோரும் அதிகரித்துள்ளனர். தினமும் வழக்கத்தை விட, பலரும் தயிர், மோர் வாங்கி செல்கின்றனர். இதனால் கே.எம்.எப்., கடைகளில் காலை 8:30 மணிக்குள் அனைத்தும் முடிந்து விடுகின்றன.

அதே வேளையில், கே.எம்.எப்., கடைகளில் பால் வைத்திருப்பது சவாலாக உள்ளது. கடும் வெயிலால் பால் சீக்கிரமே கெட்டு விடுகிறது. காலை, மாலை என இரு வேளைகளிலும், குறைந்த அளவிலேயே கடை உரிமையாளர்கள் பால் வாங்குகின்றனர்.

கே.எம்.எப்., இயக்குனர் மடிஹள்ளி பிரகாஷ் கூறுகையில், ''கர்நாடகாவில் பால், தயிர், மோர் தேவை அதிகரித்து உள்ளது. பால் சங்கங்களில் பால் இருப்பு அதிகரித்து வந்தாலும், சந்தையில் நாளுக்கு நாள் தேவை அதிகரித்து வருகிறது. இதனால் சந்தை தேவைக்கு ஏற்ப பால், தயிர், மோர் வினியோகம் செய்வது சவாலாக உள்ளது. தேவையை பூர்த்தி செய்ய நடவடிக்கை எடுக்கப்பட்டு வருகிறது,'' என்றார்.