டில்லி அரசின் 2021 - 2022ம் ஆண்டின் மதுபானக் கொள்கையில் முறைகேட்டு நடந்ததாக குற்றச்சாட்டு எழுந்தது. துணைநிலை கவர்னர் சக்சேனா உத்தரவுப்படி வழக்குப் பதிவு செய்த சி.பி.ஐ., துணை முதல்வராக இருந்த மணீஷ் சிசோடியாவை கடந்த ஆண்டு பிப்ரவரியில் கைது செய்தது.

இந்த விவகாரத்தில் நடந்த சட்டவிரோதப் பணப் பரிமாற்றம் குறித்து வழக்குப் பதிவு செய்த அமலாக்கத் துறை, கடந்த அண்டு மார்ச்சில் சிசோடியாவை கைது செய்தது.

ஓராண்டுக்கும் மேல் சிறையில் உள்ள மணீஷ் சிசோடியா தாக்கல் செய்த ஜாமின் மனுக்களை சிறப்பு நீதிமன்றம் தள்ளுபடி செய்தது.

இதையடுத்து, டில்லி உயர் நீதிமன்றத்தில் மேல் முறையீடு செய்தார். அந்த மனு, நீதிபதி ஸ்வரணா காந்த சர்மா முன் நேற்று விசாரணைக்கு வந்தது.

இதுகுறித்து பதில் மனு தாக்கல் செய்ய சி.பி.ஐ., மற்றும் அமலாக்கத் துறை ஆகியவற்றுக்கு 'நோட்டீஸ்' அனுப்ப உத்தரவிட்ட நீதிபதி சர்மா, விசாரணையை வரும் 8ம் தேதிக்கு ஒத்திவைத்தார்.