இந்திய வானிலை ஆய்வு மையம் மற்றும் கர்நாடக மாநில தேசிய பேரிடர் கண்காணிப்பு மையம், கடலோர மாவட்டங்களில் அடுத்த சில நாட்கள் அனல் காற்று வீசும் என எச்சரித்துள்ளது.

இதுதொடர்பாக தட்சிண கன்னட மாவட்ட சுகாதார அதிகாரி திம்மையா கூறியதாவது:

 காலை 11:00 மணி முதல் மதியம் 3:00 மணிக்குள் குழந்தைகள், கர்ப்பிணியர், முதியவர்கள், புற்றுநோய் பாதித்தவர்கள் வெளியே செல்வதை தவிர்க்கவும்

 தாகம் எடுக்கவில்லை என்றாலும் தண்ணீர் குடியுங்கள்

 முடிந்தவரை பருத்தி ஆடைகளை பயன்படுத்துங்கள்

 வெளியே சென்றால், கூலிங் கிளாஸ், குடை, தொப்பி, ஷூ, காலணி பயன்படுத்துங்கள்

 வெப்பம் அதிகமாக இருந்தால், வெளியே செல்வதை தவிர்க்கவும்

 உடலில் நீர்ச்சத்து இழக்க செய்யும் மது, டீ, காபி, கார்பனேட் குளிர்பானங்கள் குடிப்பதை தவிர்க்கவும்

 நிறுத்தப்பட்ட வாகனங்களில் உங்களின் செல்லப்பிராணிகளை விட்டு, விட்டு செல்ல வேண்டாம்

 மயக்கம் அடைந்தாலோ அல்லது உடல் நிலை சரியில்லை என்றாலோ, உடனடியாக மருத்துவரை சந்தியுங்கள்

 இளநீர், எலுமிச்சை தண்ணீர், மோர் போன்ற வீட்டில் தயாரிக்கப்பட்ட பானங்கள் பயன்படுத்துங்கள். இது உடலை மீண்டும் நீரேற்றம் செய்ய உதவும்

 வீட்டில் செல்லப்பிராணிகள் வளர்ப்போர், அவற்றை தினமும் தண்ணீர் குடிக்க வையுங்கள்

 வீட்டை குளிர்ச்சியாக வைத்திருங்கள். வாசல், ஜன்னல்களில் திரைசிலைகள் பயன்படுத்துங்கள், வெளிகாற்று உள்ளே வரட்டும்

 விவசாயிகள், கூலித் தொழிலாளர்கள் பணி செய்யும்போது தொப்பி அல்லது குடை அணிந்து பணியாற்றுங்கள் அல்லது தலை, கழுத்து, முகத்தில் துணியால் சுற்றிக்கொள்ளுங்கள்

 வெளியே செல்வோர், தண்ணீரை மறக்காமல் எடுத்துச் செல்லுங்கள்.

சிகிச்சை

 வெயிலால் பாதித்தவரை, நிழலில் அமர வையுங்கள்

 முதலில் ஒரு துணியால் அவரது முகத்தை துடையுங்கள். பின், தண்ணீரால் கழுவுங்கள். சாதாரண தண்ணீரை, அவரின் தலையில் ஊற்றவும். இதனால் அவரின் உடல் சூடு தணியும்

 எலுமிச்சை ஜூஸ் அல்லது உடலில் நீர்சத்து அதிகரிக்கத் தேவையான உதவியை செய்யுங்கள்

 அவரை உடனடியாக அருகில் உள்ள ஆரம்ப சுகாதார நிலையத்துக்கோ அல்லது மருத்துவமனைக்கோ அழைத்துச் சென்று, சிகிச்சை அளிக்க வேண்டும்.

இவ்வாறு அவர் கூறினார்.