கர்நாடகத்தில் வர்த்தக நிறுவன பெயர் பலகையில் 60 சதவீதம் கன்னட மொழி இடம் பெற்றிருக்க வேண்டும் என்ற சட்டம் அமலில் உள்ளது.

இதனால் கடை உரிமையாளர்கள், அவசர அவசரமாக கடையின் பெயர் பலகையில் கன்னடம் பெரிய எழுத்தில் இடம் பெறும் வகையில் அமைத்துள்ளனர். இந்நிலையில், பெலகாவி மாவட்டத்தில் பெருமளவில் மராத்தியர்கள் வசித்து வருகின்றனர்.

இங்கு கடை வைத்திருப்போர் பெரும்பாலும் ஆங்கிலம், இந்தி, கன்னடத்தில் பெயர் பலகை வைத்திருக்கின்றனர். ஒரு இடத்தில், கன்னட மொழியில் எழுத்துப் பிழை காணப்படுகிறது. உதாரணமாக, பெலகாவி நகரில் 'சத்குரு' என்ற பெயர் துணிக்கடை உள்ளது.

இந்த கடையின் பெயர் பலகையில், கன்னடத்தில் பெரிய எழுத்தில் 'சட்ட குரு' என எழுத்து பிழை இருக்கும் படம், சமூக வலைதளத்தில் பரவியது.

இதையடுத்து கன்னட ஆர்வலர்கள், பெயரில் உள்ள பிழையை மாற்றுமாறு உரிமையாளரிடம் கூறினர். இதையடுத்து 'சத்குரு' என்று மாற்றப்பட்ட பெயர் பலகை வைக்கப்பட்டது. இந்த படமும், சமூக வலைதளத்தில் பரவி வருகிறது.