உ.பி.,யின் ஹாத்ரஸ் மாவட்டத்தில் உள்ள புல்ராய் என்ற கிராமத்தில், கடந்த 2ம் தேதி ஆன்மிக சொற்பொழிவு நடந்தது. சுராஜ்பால் என்கிற போலே பாபா என்பவர் இந்த சொற்பொழிவில் பங்கேற்று பேசினார்.

இதில், 80,000 பேர் மட்டுமே பங்கேற்க அனுமதிக்கப்பட்ட நிலையில், 2.50 லட்சம் பேர் திரண்டனர். சாமியார் புறப்படும் போது ஏற்பட்ட தள்ளுமுள்ளுவில் சிக்கி, அடிபட்டும், மிதிபட்டும், மூச்சு திணறியும் 121 பேர் உயிரிழந்தனர். இதில் பெரும்பாலானோர் பெண்கள்.

இந்த விவகாரம் தொடர்பாக, சொற்பொழிவுக்கு ஏற்பாடு செய்த தலைமை ஏற்பாட்டாளர் தேவ்பிரகாஷ் மதுக்கர் என்பவர் மீது போலீசார் வழக்குப்பதிவு செய்துள்ளனர். மேலும் அடையாளம் தெரியாத ஏற்பாட்டாளர்கள் மீதும் வழக்குப்பதிவு செய்யப்பட்டுள்ளது.

ஆனால், சொற்பொழிவு நடத்திய போலே பாபா குற்றவாளியாக சேர்க்கப்படவில்லை. சந்தேகத்தின் அடிப்படையில் ஆறு பேர் இதுவரை கைது செய்யப்பட்டுள்ளனர். தலைமறைவாக உள்ள போலே பாபா, தேவ்பிரகாஷ் உள்ளிட்டோரை போலீசார் தீவிரமாக தேடி வருகின்றனர்.

உ.பி., முழுதும் மட்டுமின்றி அண்டை மாநிலங்களான ராஜஸ்தான், ஹரியானாவிலும் தேடுதல் வேட்டை தொடர்கிறது.சம்பவ இடத்துக்கு சென்ற சிறப்பு விசாரணை படை, ஹாத்ரஸ் கலெக்டர் ஆசிஷ் குமார், போலீஸ் எஸ்.பி., நிபுன் அகர்வால், மூத்த சுகாதாரத்துறை அதிகாரிகளின் வாக்குமூலத்தை பெற்று, அரசுக்கு ரகசிய அறிக்கை தாக்கல் செய்துள்ளது.

மேலும், இந்த சம்பவத்தில் வேறு சதி இருக்கிறதா என்பது குறித்து நீதி விசாரணை நடத்த, ஓய்வு பெற்ற உயர் நீதிமன்ற நீதிபதி தலைமையில் மூன்று நபர் அடங்கிய குழுவை மாநில அரசு நியமித்துள்ளது.