வடகிழக்கு மாநிலமான மேகாலயா அருகே, நம் அண்டை நாடான வங்கதேச எல்லை அமைந்துள்ளது. இதன் வழியாக, அந்நாட்டைச் சேர்ந்த பலர் சட்டவிரோதமாக உள்ளே நுழைவதாக தொடர்ந்து புகார்கள் வருகின்றன. இதை தடுக்கும் வகையில், வங்கதேச எல்லையையொட்டி உள்ள பகுதிகளில் எல்லை பாதுகாப்புப் படை வீரர்கள் தீவிர ரோந்து பணியில் ஈடுபட்டு வருகின்றனர்.

இந்நிலையில், மேகாலயாவின் எல்லை பகுதி வழியாக வங்கதேசத்தைச் சேர்ந்த நபர்கள் சட்டவிரோதமாக உள்ளே நுழைவதாக, எல்லை பாதுகாப்பு படையினருக்கு நேற்று தகவல் கிடைத்தது. இதையடுத்து, மேற்கு ஜைந்தியா ஹில்ஸ் மாவட்ட எல்லையில் நான்கு பேரும், தெற்கு கேரோ ஹில்ஸ் மாவட்ட எல்லையில் இரண்டு பேர் என, மொத்தம் ஆறு வங்கதேசத்தினர் பிடிபட்டனர்.

அவர்களிடம் நடத்திய விசாரணையில், மஹாராஷ்டிராவின் மும்பையில் ஏற்கனவே கட்டுமான பணிகளில் ஈடுபட்டதும், தற்போது மீண்டும் வேறு பணிக்காக இந்திய எல்லைக்குள் நுழைந்ததாகவும் தெரிவித்தனர்.