இதையடுத்து, உலகின் மிக வேகமாக வளரும் நாடாக இந்தியா தன்னை மீண்டும் நிரூபித்துக் காட்டியுள்ளது.

நாட்டின் பொருளாதார வளர்ச்சி குறித்த அறிவிப்பை, தேசிய புள்ளியியல் அலுவலகம் நேற்று வெளியிட்டது.

அதில், 2023 - 24 நிதியாண்டின் நான்காம் காலாண்டில், வளர்ச்சி 7.80 சதவீதமாக இருந்தது என்றும், கடந்த முழு நிதியாண்டுக்கான பொருளாதார வளர்ச்சி 8.20 சதவீதமாக அதிகரித்துள்ளது என்றும் தெரிவித்துள்ளது. முந்தைய 2022 - 23ம் நிதியாண்டில் வளர்ச்சி 7 சதவீதமாக இருந்தது குறிப்பிடத்தக்கது.

இது தொடர்பாக புள்ளியியல் அலுவலகம் மேலும் தெரிவித்துஉள்ளதாவது: இந்த அளவுக்கு வளர்ச்சியை எட்டுவதற்கு, தயாரிப்புத் துறையின் சிறப்பான செயல்பாடுகளே முக்கிய காரணமாகும்.

மதிப்பின் அடிப்படையில், நாட்டின் ஒட்டு மொத்த உள்நாட்டு உற்பத்தி, நான்காம் காலாண்டில் 47.24 லட்சம் கோடி ரூபாயாகவும்; ஒட்டுமொத்த நிதியாண்டில் 173.82 லட்சம் கோடி ரூபாயாகவும் இருந்தது.

இதற்கு முந்தைய நிதியாண்டின் இதே காலகட்டத்தில், இது முறையே 43.84 லட்சம் கோடி ரூபாயாகவும்; 160.71 லட்சம் கோடி ரூபாயாகவும் இருந்தது. இவ்வாறு தெரிவித்து உள்ளது.