வடகிழக்கு மாநிலங்களில் ஒன்றான அசாமில், முதல்வர் ஹிமந்த பிஸ்வ சர்மா தலைமையில் பா.ஜ., ஆட்சி அமைந்துள்ளது. கடந்த 2021ல் பொறுப்பேற்றது முதல், அசாமில் சட்டவிரோதமாக தங்கி உள்ளவர்களை வெளியேற்றும் நடவடிக்கைகளை ஹிமந்த பிஸ்வ சர்மா மேற்கொண்டுள்ளார். இடையில், சில ஆண்டுகள் நிறுத்தப்பட்டிருந்த இந்த நடவடிக்கை, கடந்த ஜூன் முதல் தீவிரமடைந்துள்ளது.

குறிப்பாக, அரசு நிலங்களை ஆக்கிரமித்து தங்கியுள்ளவர்களையும், அண்டை நாடான வங்கதேசத்தில் இருந்து ஊடுருவி சட்டவிரோதமாக குடியேறியவர்களையும், வெளியேற்றும் நடவடிக்கைகள் நடந்து வருகின்றன. வனப்பகுதியில் அரசு நிலங்களில் சட்டவிரோதமாக தங்கியிருந்தவர்களும் வெளியேற்றப்பட்டு வருகின்றனர். இந்த நடவடிக்கையின்படி, இதுவரை 50,000க்கும் மேற்பட்டோர் வெளியேற்றப்பட்டுள்ளனர்.

நாகோன் மாவட்டத்தில் லுட்டிமரி பகுதியில் தங்கியிருந்த ஊடுருவல்காரர்களை வெளியேற்ற, மாநில அரசு இரண்டு மாதம் கெடு விதித்தது. அங்கு தங்கியிருந்த மக்களின் கோரிக்கையை ஏற்ற அரசு, மேலும் ஒரு மாதம் கூடுதல் அவகாசம் வழங்கியது. மூன்று மாதங்களாகியும், அங்கு தங்கியிருந்த சட்டவிரோத குடியேறிகள் காலி செய்யாததை அடுத்து, அவர்களை வெளியேற்றும் பணி நேற்று நடந்தது.

லுட்டிமரியில் தங்கியிருந்த 1,500 குடும்பங்கள் வலுக்கட்டாயமாக வெளியேற்றப்பட்டன. கடந்த 40 ஆண்டுகளுக்கு மேலாக அங்கு தங்கியுள்ளதாக கூறிய ஆக்கிரமிப்பாளர்கள், இது அரசு நிலம் என தெரியாது என்றும் தெரிவித்தனர். இருப்பினும், அவர்களை வெளியேற்றிய அதிகாரிகள், எல்லையில் உள்ள சிறப்பு முகாம்களுக்கு அனுப்பி வைத்தனர்.

இவர்களில் பெரும்பாலானோர், வங்காள மொழி பேசும் முஸ்லிம் சமூகத்தைச் சேர்ந்தவர்கள் என அதிகாரிகள் தெரிவித்தனர். வெளியேற்ற நடவடிக்கை காரணமாக, நாகோன் மாவட்டத்தில் பல இடங்களில் பாதுகாப்புப் படை வீரர்கள் குவிக்கப்பட்டனர். ஆவணங்கள் சரிபார்ப்புக்கு பின்னர், அவர்கள் சொந்த நாட்டுக்கு அனுப்பி வைக்கப்படுவர்.