மூன்று நாட்களாக பக்தர்கள் கூட்டம் அதிகமாக இருந்தது. தினசரி 92,000 பக்தர்கள் தரிசனம் நடத்தினர். இதனால் சில மணி நேரம் காத்திருக்க வேண்டிய நிலை ஏற்பட்டது. சரங்குத்தியில் இருந்து பக்தர்கள் கட்டம், கட்டமாக அனுப்பப்பட்டனர். டிச., 18 இரவு 10:00 மணி வரை 26 லட்சத்து, 8,349 பேர் தரிசனம் நடத்தியுள்ளனர். இது நேற்று 27 லட்சத்தை கடந்தது.

மண்டல பூஜைக்கு இன்னும் ஆறு நாட்கள் மட்டுமே உள்ள நிலையில், சபரிமலையில் அதற்கான ஏற்பாடுகள் தீவிரமடைந்துள்ளது. டிச., 22 காலை 6:00 மணிக்கு ஆரன்முளா பார்த்தசாரதி கோவிலில் இருந்து தங்க அங்கி பவனி புறப்பட்டு, 25 மதியம் பம்பை வந்தடைகிறது. இங்கு கணபதி கோவில் அருகே தரிசனத்திற்காக வைக்கப்படும் தங்க அங்கி பின்னர் தலை சுமையாக சன்னிதானம் கொண்டுவரப்படும். அன்று மாலை, 6:30 மணிக்கு தங்க அங்கி அணிவித்து தீபாராதனை நடைபெறும்.

டிச., 26-ல் மண்டல பூஜை நடைபெறுகிறது. அன்று அதிகாலை, 3:30க்கு தொடங்கும் நெய்யபிஷேகம் காலை, 11:00 மணியுடன் நிறைவுறும். மதியம், 12:00-க்கு தங்க அங்கி அணிவித்து மண்டல பூஜை நடைபெறும். தொடர்ந்து நடை அடைக்கப்படும். மாலை, 4:00க்கு நடை திறந்து இரவு, 10:00 அல்லது 11:00க்கு நடை அடைக்கப்படும். அதன்பின், மகர விளக்கு கால பூஜைகளுக்காக டிச., 30 மாலை, 5:00 மணிக்கு மீண்டும் நடை திறக்கப்படும்.