இண்டியா கூட்டணியில் இடம்பெற்றுள்ள காங்கிரசுக்கு இடம் கொடுக்காமல் மேற்குவங்கத்தில் தனித்து போட்டி என திரிணமுல் காங்., சமீபத்தில் அறிவித்தது. இது தொடர்பாக திரிணமுல் காங்கிரஸ் எம்.பி.,யும், அக்கட்சியின் தேசிய பொதுச்செயலாளருமான அபிஷேக் பானர்ஜி கூறியதாவது: நீங்கள் ஒருவருடன் கூட்டணியில் இருக்கும்போது, ​​​​முதலில் செய்ய வேண்டியது தொகுதி பங்கீடு ஒப்பந்தத்தை முடிப்பதுதான். அதுதான் கூட்டணியின் அடிப்படை விதிமுறை. நாங்கள் ஜூன் மாதத்தில் இருந்து தொகுதி பங்கீடு ஏற்பாடு பற்றி காங்கிரசிடம் கேட்டோம். ஏழு மாதங்கள் கடந்துவிட்டன; அவர்கள் எதுவும் செய்யவில்லை.

இண்டியா கூட்டணியின் கடைசி கூட்டம் டில்லியில் நடந்தபோது கூட, மம்தா பானர்ஜி, மேற்குவங்கத்தில் தொகுதி பங்கீடு பற்றி இறுதி செய்ய டிசம்பர் 31 வரை காலக்கெடுவை நிர்ணயித்தார். இப்போது ஜனவரி கடைசி வாரத்தில் இருக்கிறோம்; இதுவரை அவர்கள் எதுவும் செய்யவில்லை. லோக்சபா தேர்தல் குறித்த அறிவிப்பு மார்ச் மாதத்தில் வெளியாகலாம். ஆனால் எந்த தொகுதிகளில் போட்டியிடுவது, எந்தெந்த இடங்களை கூட்டணிக்கு ஒதுக்குவது என்பது பற்றி இன்னும் முடிவெடுக்கவில்லை. இவ்வாறு அவர் கூறினார்.