நம் நாட்டில் வசிப்பவர் களுக்கு முக்கிய ஆவணமாக ஆதார் உள்ளது. மத்திய அரசின் இந்திய தனித்துவ அடையாள ஆணையம் வழங்கும் ஆதார் அட்டையில், ஒவ்வொருவருக்குமான தனி எண் தரப்பட்டுள்ளது.

இதில், சம்பந்தப்பட்ட நபரின் புகைப்படம், பிறந்த தேதி மற்றும் ஆண்டு, முகவரி உள்ளிட் டவை இடம்பெற்றிருக்கும்.

ரத்து குழந்தைகளை பள்ளியில் சேர்ப்பது முதல் அரசின் அனைத்து திட்டங்கள் வரை, இந்த ஆதார் எண் இணைக்கப்பட்டு வருகிறது. வங்கியில் கணக்கு துவங்கவும், வருமான வரி கணக்கு தாக்கல் செய்யவும், அரசு நலத்திட்டங்களின் பலனை பெறவும், ஆதார் எண் அவசியமாகிறது.

எஸ்.ஐ.ஆர்., எனப்படும் வாக்காளர் பட்டியல் சிறப்பு தீவிர திருத்தப் பணி தொடர்பான வழக்கை கடந்த செப்டம்பரில் விசாரித்த உச்ச நீதிமன்றம், 'வாக்காளர் பட்டியலில் பெயர்களை சேர்க்க, ஆதார் அட்டையை 12வது ஆவணமாக சேர்க்க வேண்டும்' என, தேர்தல் கமிஷனுக்கு உத்தரவிட்டிருந்தது.

இந்நிலையில், பிறப்பு சான்றிதழாகவோ, பிறந்த தேதிக்கான சான்றாகவே ஆதார் அட்டை இனி ஏற்றுக்கொள்ளப்படாது என, மஹாராஷ்டிரா மற்றும் உத்தர பிரதேச அரசுகள் அறிவித்துள்ளன.

இது தொடர்பாக மஹாராஷ்டிரா மாநில வருவாய் துறை வெளியிட்டுள்ள அறிவிப்பில், 'பிறப்பு மற்றும் இறப்பு பதிவு திருத்த சட்டம் - 2023 அமல்படுத்தப்பட்ட பின், ஆதாரை மட்டுமே அடிப்படையாகக் கொண்டு வழங்கப்பட்ட அனைத்து பிறப்புச் சான்றிதழ்களும் ரத்து செய்யப்படும்.

'அத்தகைய சான்றிதழ்கள் வழங்கிய அதிகாரிகள் மீது கடும் நடவடிக்கை எடுக்கப்படும். அவ்வாறு வழங்கப்பட்ட சான்றிதழ்களை அதிகாரிகள் சரிபார்த்து திரும்ப பெற வேண்டும்' என தெரிவிக்கப்பட்டுள்ளது.

உத்தர பிரதேச அரசும், பிறப்பு சான்றிதழாக ஆதார் அட்டை ஏற்றுக்கொள்ளப்படாது என தெரிவித்துள்ளது. இது குறித்து, அனைத்து துறைகளுக்கும் மாநில திட்டத் துறையின் சிறப்பு செயலர் அமித்சிங் பன்சால் சுற்றறிக்கை ஒன்றை அனுப்பியுள்ளார்.

விமர்சனம் அதில், 'ஆதார் அட்டை பெறும் போது, பிறந்த தேதிக்கான அதிகாரப்பூர்வ ஆவணம் இணைக்கப்படாததால், பிறந்த தேதிக்கான சான்றாக அதை பயன்படுத்த முடியாது.

'அரசு தொடர்பான விண்ணப்பங்களில், பிறந்த சான்றுக்காக ஆதார் அட்டை இனி ஏற்கப்படாது. அனைத்து துறைகளும் இந்த உத்தரவை பின்பற்ற வேண்டும்' என, தெரிவித்துள்ளார்.

உத்தர பிரதேசத்தில் சட்ட விரோதமாக தங்கியுள்ளவர்கள் மீது கடும் நடவடிக்கை எடுக்க உத்தரவிட வேண்டும் என, மாவட்ட நீதிபதிகளுக்கு மாநில முதல்வர் யோகி ஆதித்யநாத் பரிந்துரைத்திருந்தார்.

ஊடுருவல்காரர்களை தங்கவைக்க மாவட்டந்தோறும் தற்காலிக தடுப்பு மையங்கள் துவங்கவும் அவர் உத்தரவிட்டிருந்தார். இந்நிலையில், பிறப்பு சான் றாக ஆதார் ஏற்றுக்கொள்ளப் படாது என, உத்தர பிரதேச அரசு அறிவித்துள்ளது.

இங்கு, எஸ்.ஐ.ஆர்., பணிகள் நடந்து வரும் சூழலில், அரசின் இந்த உத்தரவு பல்வேறு விமர்சனங்களை ஏற்படுத்திஉள்ளது.