டில்லியில் ஆண்டு தோறும் அக்., - பிப்., வரை பனிப்பொழிவு அதிகமாக இருக்கும். இந்தக் காலக்கட்டங்களில் காற்று மாசு அதிகரிப்பதும் வழக்கம்.

இந்தாண்டும், கடந்த இரண்டு மாதங்களாக காற்று மாசு அதிகரித்துள்ளது. அண்டை மாநிலங்களான பஞ்சாப், ஹரியானாவில் அறுவடைக்கு பின், பயிர்க் கழிவுகளை விவசாயிகள் எரிப்பதே, டில்லியின் காற்று மாசுக்கு காரணமாக கூறப்படுகிறது .

தீபாவளி பண்டிகையின்போது பட்டாசுகள் வெடிப்பதற்கு விதிக்கப்பட்டிருந்த தடை நீக்கப்பட்டதும், இந்தாண்டு காற்று மாசு அதிகரிப்புக்கு காரணமாக கூறப் படுகிறது.

இந்நிலையில், டில்லி மற்றும் தேசிய தலைநகர் பிராந்திய பகுதிகளில், கடந்த 15 நாட்களாக காற்று மாசு அதிகரித்து உள்ளது.

காற்றின் தரக் குறியீட்டு அளவு 350 புள்ளிகளுக்கு மேல் இருந்தால், அது மிகவும் மோசம் என்று அழைக்கப்படுகிறது. அதாவது, சுவாசப் பிரச்னைகளை உருவாக்கும் அபாயம் அதிகம் உள்ளது.

இந்நிலையில், டில்லியில் தொடர்ந்து, 15 நாட்களாக இந்த தரக் குறியீடு, 350 புள்ளிகளுக்கு மேல் நீடித்து வருகிறது. குறிப்பாக, புறநகர் பகுதியான நரேலாவில், காற்று தரக் குறியீடு நேற்று அதிகபட்சமாக 387 என்று பதிவானது.

ஆர்.கே.புரம் - 372; துவாரகா செக்டார் 8 - 370; ரோஹிணி - 367; முண்ட்கா - 367; ஜஹாங்கீர்புரி - 365; பூசா - 364 என, பெரும்பாலான பகுதிகளில், மிகவும் மோசம் என்ற அளவிலேயே காற்றின் தரம் பதிவாகி இருந்தது.