பீஹாரில் இரண்டு நாட்களுக்கு முன் நடந்த சாலை விபத்தில் 9 பேர் பலியானார்கள். உயிரிழந்தவர்களின் குடும்பத்தினருக்கு இரங்கல் தெரிவிக்க, ஊரக வளர்ச்சிதுறை அமைச்சர் ஷ்ரவன் குமார் நாலந்தா சென்றார். அங்கிருந்த மக்கள், உயிரிழந்தவர்களின் குடும்பத்தினருக்கு இழப்பீடு தருமாறு கோரினர்.

அதற்கு அமைச்சர் ஷ்ரவன் குமார், அது குறித்து பிறகு பேசிக்கொள்ளலாம் என்று கூறிவிட்டு புறப்பட்டார். இதனை தொடர்ந்து, அமைச்சரை விரட்டிச் சென்று கிராம மக்கள் தாக்கினர்.

ஜோகிபூர் மலாவன் கிராமத்தில் ஆத்திரமடைந்த கூட்டம் அமைச்சரை ஒரு கிலோமீட்டர் தூரம் துரத்திச் சென்றது. இந்த சம்பவத்தில் அமைச்சரின் மெய்க்காப்பாளர்கள் காயமடைந்தனர்.

அமைச்சரும் எம்.எல்.ஏவும் பெரிய காயங்கள் இல்லாமல் தப்பினர், ஆனால் இந்த சம்பவத்தில் ஏராளமான பாதுகாப்புப் பணியாளர்கள் காயமடைந்தனர்.

இது குறித்து அமைச்சர் ஷ்ரவன் குமார் கூறியதாவது, நாலந்தாவில் நடந்த ஒரு சாலை விபத்தில் 9 பேர் இறந்த பிறகு, இன்று காலை பாதிக்கப்பட்டவர்களின் குடும்பத்தினரைச் சந்திக்கச் சென்றேன். அனைவருக்கும் சரியான நேரத்தில் நிதி உதவி கிடைப்பதை உறுதி செய்வதற்காக அதிகாரிகளையும் அழைத்துச் சென்றேன். பாதிக்கப்பட்டவர்களின் குடும்பத்தினரைச் சந்தித்துவிட்டு நான் வெளியேறவிருந்தபோது, ​​சிலர் தங்கள் அதிருப்தியை வெளிப்படுத்தத் தொடங்கினர்.

சிலர் இந்த விவகாரம் மேலும் மோசமடைய வேண்டும் என்றும், ஒரு சர்ச்சை வெடிக்க வேண்டும் என்றும் விரும்பினர். ஆனால் நான் அங்கிருந்து அமைதியாகச் சென்றேன் என்று கூறினார்.

வன்முறை குறித்த தகவல்கள் கிடைத்த பிறகு, அப்பகுதியில் உள்ள பல காவல் நிலையங்களைச் சேர்ந்த போலீஸ் அதிகாரிகள் சம்பவ இடத்திற்கு வந்து விரிவான விசாரணையைத் தொடங்கினர்.