கர்நாடக சட்டமேலவையில், நேற்று பட்ஜெட் தொடர்பாக நடந்த விவாதம்:

பா.ஜ., - கோட்டா சீனிவாச பூஜாரி: விதான்சவுதா வளாகத்தில், பாகிஸ்தான் ஜிந்தாபாத் என, கோஷமிட்டவர்களை கைது செய்யவில்லை. இந்த அரசுக்கு, ஆட்சியில் நீடிக்கும் அருகதை இல்லை.

அமைச்சர் போசராஜ்: இது பற்றி ஏற்கனவே விரிவாக விவாதம் நடந்துள்ளது. சட்டத்துறை அமைச்சர் ஹெச்.கே.பாட்டீல் சிறப்பாக பதில் அளித்துள்ளார்.

காங்கிரஸ் கொறடா சலீம்: எதிர்க்கட்சியினருக்கு விவாதிக்க எந்த விஷயங்களும் இல்லை. ஒரே விஷயத்தை அவ்வப்போது பேசி, அவையின் நேரத்தை பாழாக்குகின்றனர்.

சட்டமேலவை தலைவர் நடவடிக்கை எடுக்க வேண்டும். அவையின் விதிமுறையை பின்பற்றாமல், அவை தலைவரின் பீடத்துக்கு களங்கம் ஏற்படுத்துகின்றனர்.

பாஜ., தலைமை கொறடா ரவிகுமார்: சம்பவம் நடந்து 36 மணி நேரம் கடந்தும், குற்றவாளியை கைது செய்யவில்லை. அவர்களை காப்பாற்ற முயற்சிக்கலாம் என்ற சந்தேகம் உள்ளது. இது குறித்து, முதல்வர், உள்துறை அமைச்சர் பதிலளிக்க வேண்டும்.

சட்டமேலவை தலைவர் பசவராஜ் ஹொரட்டி: ஏற்கனவே விவாதம் முடிந்துள்ளது. அரசு பதில் அளித்துள்ளது. இந்த விஷயம் பற்றி விவாதிக்க, வாய்ப்பளிக்க மாட்டேன்.

பா.ஜ., உறுப்பினர்கள் அதிருப்தி அடைந்து, அவைத் தலைவர் இருக்கைக்கு முன் சென்று, தர்ணாவில் ஈடுபட்டனர். இதனால் சிறிது நேரம் கூட்டம் ஒத்திவைக்கப்பட்டது.