லோக்சபா தேர்தல் தேதி அறிவிப்பு இம்மாத இறுதி அல்லது, அடுத்த மாதம் முதல் வாரத்தில் வெளியாக வாய்ப்பு உள்ளது. கர்நாடகாவில் லோக்சபா தேர்தலுக்காக ஆளுங்கட்சியான காங்கிரஸ், எதிர்க்கட்சியான பா.ஜ., - ம.ஜ.த., தயாராகி வருகின்றனர்.

வேட்பாளர்களை தேர்வு செய்யும் பணிகள் மும்முரமாக நடந்து வருகின்றன. பா.ஜ., - ம.ஜ.த., கூட்டணி 28 தொகுதிகளிலும் வெற்றி பெறுமென, அக்கட்சிகளின் தலைவர்கள் கூறி வருகின்றனர்.

இந்நிலையில் ஏழு தொகுதிகளுக்கு வேட்பாளர்களை தேர்வு செய்ய, பா.ஜ., திணறி வருகிறது. அந்த தொகுதிகள் தாவணகெரே, பீதர், ஹாவேரி, மைசூரு, பெங்களூரு வடக்கு, மாண்டியா, சித்ரதுர்கா ஆகியவை.

l தாவணகெரே எம்.பி.,யாக உள்ள சித்தேஸ்வருக்கு, 'சீட்' வழங்க கட்சிக்குள்ளேயே எதிர்ப்பு கிளம்பி உள்ளது

l பீதர் எம்.பி.,யான மத்திய அமைச்சர் பகவந்த் கூபாவுக்கு, 'சீட்' தர கூடாது என்று, மாநில தலைவர் விஜயேந்திரா காலில் விழுந்து, பா.ஜ., - எம்.எல்.ஏ., பிரபு சவுஹான் பரபரப்பை ஏற்படுத்தினார்

l ஹாவேரி தொகுதியில் தொடர்ந்து 3 முறை வென்ற, சிவகுமார் உதாசி தேர்தல் அரசியலில் இருந்து, ஓய்வு பெறுவதாக அறிவித்துவிட்டார். அந்த தொகுதிக்கு இதுவரை சரியான வேட்பாளர் கிடைக்கவில்லை. முன்னாள் முதல்வர் பசவராஜ் பொம்மையின் பெயர் அடிபட்டாலும், உறுதியான தகவல் இல்லை

l மைசூரு எம்.பி., பிரதாப் சிம்ஹாவுக்கு வாய்ப்பு கொடுக்க, கட்சிக்குள் எதிர்ப்பு கிளம்பி உள்ளது

l பெங்களூரு வடக்கில் தற்போதைய எம்.பி., சதானந்த கவுடாவுக்கு பதில், இன்னொருவரை தேர்வு செய்ய முடியாத நிலை உள்ளது

l மாண்டியாவில் 'சீட்' கேட்டு சுமலதா அடம்பிடிக்கிறார்

l சித்ரதுர்கா எம்.பி.,யும், மத்திய அமைச்சருமான நாராயணசாமிக்கு தேசிய அரசியலில் விருப்பம் இல்லை.

மேற்கண்ட காரணங்களாலும், 'சீட்' கேட்டு இளம் தலைவர்கள் அழுத்தம் கொடுப்பதாலும், இந்த ஏழு தொகுதிகளுக்கும், வேட்பாளர்களை தேர்வு செய்ய முடியாமல், பா.ஜ., திணறி வருவதாக தகவல் வெளியாகி உள்ளது.