சி.பி.எஸ்.இ.,யின் பிளஸ் 2 வகுப்பிற்கான கணிதத்தேர்வு நேற்று முன்தினம் நடைபெற்றது. இந்தத் தேர்வுக்கான வினாத்தாள் சிலவற்றில் இடம்பெற்ற க்யூ.ஆர்.குறியீடு பகுதியை, மாணவர்கள் ஸ்கேன் செய்துள்ளனர்.

சந்தேகம்

அப்போது, அது பாடத்திட்டம் தொடர்பான தகவல்களுக்கு மாறாக, ஐரோப்பிய நாடான பிரிட்டனைச் சேர்ந்த புகழ்பெற்ற பாடகர் ரிக் ஆஸ்ட்லியின் பாடல் இடம்பெற்ற யூ டியூப் வீடியோ பதிவிற்கு சென்றது.

இந்தச் சம்பவம் தொடர்பான வீடியோக்கள், சமூக வலைதளங்களில் வேகமாக பரவியது. இதனால், அந்த வினாத்தாளின் பாதுகாப்பு குறித்து மாணவர்களிடையே பெரும் சந்தேகத்தை எழுப்பியது.

இந்நிலையில், சி.பி.எஸ்.இ., தரப்பில் விளக்கம் அளிக்கப்பட்டுள்ளது.

இதுதொடர்பாக அந்த வாரியத்தின் தேர்வு கட்டுப்பாட்டாளர் டாக்டர் சன்யம் பரத்வாஜ் நேற்று வெளியிட்ட அறிக்கை:

சி.பி.எஸ்.இ., பிளஸ் 2 கணித வினாத்தாள் முற்றிலும் உண்மைத்தன்மை உடையது; அதன் பாதுகாப்பு விவகாரத்தில் எவ்வித சமரசமும் செய்யப்படவில்லை.

ஒரு சில வினாத்தாள் தொகுப்புகளில் உள்ள க்யூ.ஆர்.குறியீடு, யூ டியூப் வீடியோவிற்குச் சென்றதாக புகார் எழுந்துள்ளது.

விசாரணை

இது, தேர்வின் நம்பகத்தன்மைக்கு எந்தப் பாதிப்பையும் ஏற்படுத்தாது. எனினும், இந்த விவகாரம் மிகவும் தீவிரமாக எடுத்துக்கொள்ளப்பட்டுள்ளது.

இதைப் பற்றி விசாரிக்க உத்தரவிடப்பட்டுள்ளது. வருங்காலங்களில் இது போன்ற குளறுபடிகள் நடக்காமல் இருக்க உரிய நடவடிக்கைகள் எடுக்கப்படும்.

இவ்வாறு அதில் குறிப்பிடப்பட்டு உள்ளது.