லோக்சபா தேர்தலில் இண்டியா கூட்டணியில், விடுதலைச் சிறுத்தைகள் கட்சி இடம்பெற்றுள்ளது. தமிழகத்தில் தி.மு.க., கூட்டணியில் 2 தனித் தொகுதிகள், 1 பொதுத் தொகுதியை வி.சி., கேட்டுள்ளது. இதில், உதயசூரியன் சின்னத்தில் போட்டியிடாமல் தனிச் சின்னத்தில் போட்டியிடும் முடிவில் வி.சி., உள்ளது.

இதன் காரணமாக, தொகுதிப் பங்கீட்டில் தொடர்ந்து இழுபறி நீடித்து வருகிறது. நாளை அறிவாலயத்தில் வி.சி., கட்சியுடன் தி.மு.க., 2ம் கட்ட பேச்சுவார்த்தையை நடத்த உள்ளதாக கூறப்படுகிறது.

இந்நிலையில், தென்மாநில வி.சி., செயற்குழு நிர்வாகிகள் உடன் ஆலோசனை நடத்திய பின், திருமாவளவன் கூறியதாவது:

தெலங்கானா மாநிலத்தில் 10 தொகுதிகளில் வி.சி., போட்டியிடுகிறது. கர்நாடகாவில் 6 தொகுதிகளிலும் கேரளாவில் 3 தொகுதிகளிலும் போட்டியிடுகிறோம்.

ஆந்திர மாநிலத்தில் இண்டியா கூட்டணியுடன் இணைந்து போட்டியிடுகிறோம். இது தொடர்பாக, ஆந்திர மாநில காங்கிரஸ் கட்சியுடன் பேச்சுவார்த்தை நடத்தி வருகிறோம். தமிழகத்தில், தி.மு.க.,விடம் இருந்து அழைப்பு வந்தால் பேச்சுவார்த்தைக்கு செல்வோம்.

இவ்வாறு அவர் கூறினார்.