அமெரிக்காவின் அடுத்த அதிபராக, குடியரசுக் கட்சியின் டொனால்டு டிரம்ப், வரும் 20ம் தேதி பதவியேற்க உள்ளார். அதிபர் தேர்தலில் அவர் வென்ற பின், கனடா பிரதமர் ஜஸ்டின் ட்ரூடோ, ஹங்கேரி பிரதமர் விக்டோர் ஓர்பான் உள்ளிட்டோர் சந்தித்தனர்.

அந்த வகையில், ஐரோப்பிய நாடான இத்தாலியின் பிரதமர் ஜார்ஜியா மெலானி, டிரம்பை அவருடைய மாளிகையில் நேற்று சந்தித்துப் பேசினார். 'மிகச் சிறந்த பெண்' என, மெலானியை டிரம்ப் பாராட்டினார்.

பின்னர், 2020 அமெரிக்க அதிபர் தேர்தலில் டிரம்புக்கு ஆதரவாக செயல்பட்ட ஒரு வழக்கறிஞர் தொடர்பான ஆவணப் படத்தை பார்த்தபடி, இருவரும் இரவு விருந்தில் பங்கேற்றனர்.

தற்போதைய அமெரிக்க அதிபர் ஜோ பைடன், அடுத்த சில நாட்களில் இத்தாலியின் ரோம் நகருக்கு செல்ல உள்ளார். அப்போது, ஜார்ஜியா மெலானியை சந்தித்து பேச உள்ளார்.

இந்நிலையில், தனிப்பட்ட முறையில் அமெரிக்கா சென்ற மெலானி, டொனால்டு டிரம்பை சந்தித்துள்ளார்.