தர்மசாலா: இந்திய அணிக்கு எதிரான 5வது டெஸ்ட் போட்டியின் முதல் இன்னிங்சில் இங்கிலாந்து அணி 218 ரன்களுக்கு ஆல்அவுட் ஆனது. இந்திய தரப்பில் குல்தீப் 5, அஸ்வின் 4 விக்கெட்கள் கைப்பற்றினர். முதல்நாள் முடிவில் இந்திய அணி ஒரு விக்., இழப்பிற்கு 135 ரன்கள் சேர்த்தது.

இந்தியா வந்துள்ள இங்கிலாந்து அணி ஐந்து போட்டி கொண்ட டெஸ்ட் தொடரில் பங்கேற்கிறது. முதல் டெஸ்டில் இங்கிலாந்து வென்றது. பின் எழுச்சி பெற்ற இந்திய அணி, அடுத்த மூன்று டெஸ்டில் வெற்றி பெற்று, 3-1 என்ற முன்னிலையுடன் கோப்பையை கைப்பற்றியது. இரு அணிகள் மோதும் ஐந்தாவது மற்றும் கடைசி டெஸ்ட் இன்று (மார்ச் 7) தர்மசாலாவில் துவங்கியது. 'டாஸ்' வென்ற இங்கிலாந்து அணி கேப்டன் பென் ஸ்டோக்ஸ் 'பேட்டிங்' தேர்வு செய்தார். அதன்படி கிராலே, டக்கெட் ஆகியோர் இங்கி., அணிக்கு துவக்கம் தந்தனர். ஸ்கோர் 64ஐ எட்டியபோது இந்த ஜோடியை குல்தீப் யாதவ் பிரித்தார். டக்கெட் (27), போப் (11), கிராலே (79), 100வது டெஸ்டில் களமிறங்கிய ஜானி பேர்ஸ்டோவ் (29) என அடுத்தடுத்து குல்தீப் சுழலில் சிக்கினர். பெரிதும் எதிர்பார்க்கப்பட்ட ஜோ ரூட் 26 ரன்னில் வெளியேறினார். கேப்டன் ஸ்டோக்ஸ் 'டக் அவுட்' ஆகி ஏமாற்றினார். 100வது டெஸ்ட் விளையாடும் அஸ்வின் சுழலில் டாம் ஹார்ட்லே (6), மார்க் உட் (0), பென் போகஸ் (24), ஆண்டர்சன் (0) அடுத்தடுத்து அவுட்டாகினர். இதனால் இங்கிலாந்து அணி 218 ரன்களுக்கு ஆல்அவுட் ஆனது. இந்திய அணி தரப்பில் குல்தீப் 5, அஸ்வின் 4, ஜடேஜா 1 விக்கெட் வீழ்த்தினர்.