உத்தர பிரதேசம், ஹரியானா, பஞ்சாப்பில் உள்ள விவசாய சங்கங்கள் வேளாண் பொருட்களுக்கு எம்.எஸ்.பி., எனப்படும் குறைந்தபட்ச ஆதார விலைக்கு உத்தரவாதம் அளிக்கும் சட்டம், ஓய்வூதியம், நில அபகரிப்புக்கு உரிய நிவாரணம் உள்ளிட்ட கோரிக்கைகளை வலியுறுத்தி, தலைநகர் டில்லியை நோக்கி பேரணியாக அணிவகுத்து செல்ல இன்று அழைப்பு விடுத்திருந்தது.

இந்நிலையில், மத்திய அரசை கண்டித்து, முற்றுகை போராட்டத்துக்காக மாநிலங்களில் இருந்து விவசாயிகள் டில்லி நோக்கி புறப்பட்டனர். இதனால் டில்லியில் உள்ள முக்கிய எல்லை பகுதிகளில் கூடுதல் போலீசார் நிறுத்தப்பட்டுள்ளனர். நகரின் முக்கிய பாதைகள் மாற்றி விடப்பட்டதால் , வாகன ஓட்டிகள் கடும் அவதி அடைந்துள்ளனர். கடும் போக்குவரத்து நெரிசல் ஏற்பட்டது.

டில்லியில் வரும் மார்ச் 12ம் தேதி வரை 144 தடை உத்தரவு பிறப்பிக்கப்பட்டுள்ளது. போராட்டக்காரர்கள் ஏதும் அசம்பாவிதத்தில் ஈடுபடாமல் இருக்க ஆயிரக்கணக்கான போலீசார் குவிக்கப்பட்டுள்ளனர். துணை ராணுவ படையினரும் பாதுகாப்பு பணியில் ஈடுபட்டுள்ளனர்.

சுப்ரீம் கோர்ட் தலைமை நீதிபதிக்கு வேண்டுகோள்

சுப்ரீம் கோர்ட் வழக்கறிஞர்களின் சங்க தலைவர் ஆதிஷ் அகர்வாலா சுப்ரீம் கோர்ட் தலைமை நீதிபதிக்கு ஒரு கடிதம் எழுதியுள்ளார்.

அதில், 'இடையூறு ஏற்படுத்தும் வகையிலும், மக்களின் அன்றாட வாழ்க்கையை பாதிக்கும் வகையிலும் விவசாயிகள் நடத்த இருக்கும் பேரணிக்கு எதிராக தாமாக முன்வந்து நடவடிக்கை எடுக்க வேண்டும்' எனக் குறிப்பிட்டுள்ளார்