அமெரிக்காவின், 'லாக்ஹீட் மார்ட்டின்' நிறுவனம், 'எம்.எச்.,60ஆர்' ஹெலிகாப்டரை தயாரிக்கிறது. இது அனைத்து வானிலைகளிலும் இயங்கக்கூடியது. கடல் ரோந்து, மீட்பு மற்றும் தேடுதல் பணி, நீர்மூழ்கிகளை கண்டறிதல் ஆகிய பணிகளுக்கு இது பயன்படுத்தப்படுகிறது.

கடந்த, 2020 பிப்ரவரியில் 24 'எம்.எச்.,60ஆர்' ஹெலிகாப்டர்களை வாங்க அமெரிக்காவுடன் இந்தியா ஒப்பந்தம் செய்தது. இதன் வினியோகம், 2021ல் இருந்து துவங்கியது.

இந்நிலையில், இந்த ஹெலிகாப்டர்களின் ஐந்து ஆண்டு கால பாரமரிப்புக்காக, 7,995 கோடி ரூபாய் ஒப்பந்தம் அமெரிக்காவுடன் கையெழுத்தாகி உள்ளது.

இது குறித்து ராணுவ அமைச்சகம் வெளியிட்ட அறிக்கை:

பராமரிப்பு சேவை ஒப்பந்தத்தில் உதிரிபாகங்கள் வழங்கல், பயிற்சி மற்றும் தொழில்நுட்ப உதவி, பழுது நீக்கம் ஆகிய அனைத்தும் அடங்கிய முழுமையான அம்சங்கள் சேர்க்கப்பட்டுள்ளன. ஹெலிகாப்டர் பழுது நீக்கம் மற்றும் பரிசோதனை மையங்கள் இந்தியாவிலேயே அமைக்கப்படும்.

இதனால் நீண்ட காலத்திற்கு நம் நாட்டின் ஹெலிகாப்டர் திறன் மேம்படும்; அமெரிக்கா மீதான சார்பு குறையும். நடுத்தர, சிறிய நிறுவனங்கள் மூலமாக உள்நாட்டு தயாரிப்புகள் மற்றும் சேவைத் துறைகள் வளர்ச்சியடையும்

இவ்வாறு அதில் கூறப்பட்டுள்ளது.