இந்த நிறுவனம் சட்டவிரோத பண பரிமாற்றத்தில் ஈடுபட்டுள்ளது என்று புகார் வரவே, அமலாக்கத்துறை ரெய்டு நடத்தியது. இதன் இயக்குநர்கள் கைது செய்யப்பட்டனர்; இதையடுத்து இந்த நிறுவனம் இப்போது மூடப்பட்டுள்ளது.

இந்த ரெய்டின் போது, ஐ-பேக் அலுவலகத்திற்குள் சென்று, சில ஆவணங்களை துாக்கி சென்று விட்டார் மம்தா; இதை எதிர்த்து, அமலாக்கத்துறை உச்ச நீதிமன்றத்தில் முறையிட்டது. 'முதல்வரே இப்படி செய்தால் எப்படி ஜனநாயகம் தழைக்கும்?' என, மம்தாவின் நடவடிக்கைக்கு நீதிமன்றம் கடும் கண்டனம் தெரிவித்தது.

ஐ- பேக் மீது உள்ள குற்றச்சாட்டு, நிலக்கரி கடத்தல் வழக்காகும். ரெய்டை அடுத்து, சில ஊழியர்களுக்கு தொடர்ந்து சம்மன் அனுப்பி வந்தது அமலாக்கத்துறை; இதனால் அலுவலகம் மூடப்பட்டது. ஆனாலும், ஐ-பேக், திரிணமுலுக்கு ஆதரவு அளிக்கும் என்று சொல்லப்பட்டது.

இந்நிலையில், ஐ-பேக் ஊழியர்கள் பலர், பா.ஜ.,வுக்காக தேர்தல் ஆலோசனை வழங்கி வரும் நிறுவனங்களுக்கு, தேர்தல் பணியாற்ற தொடங்கி விட்டனர்; இது மம்தாவை சிக்கலில் ஆழ்த்தியுள்ளது.

'ஐ-பேக்கில் தான் திரிணமுலின் ஊழல் பணம் உள்ளது; அதன் வாயிலாக தான், தேர்தலுக்கான செலவுகள் மேற்கொள்ளப்படுகின்றன' என்று ஒரு பேச்சும் உள்ளது. இப்போது, ஐ-பேக்கின் பல ஊழியர்கள், பா.ஜ., சார்பு அமைப்புகளுக்கு சென்றுவிட்டதால், திரிணமுல் விவகாரங்களை, இவர்கள் போட்டுக் கொடுத்து விடுவர் என்று மம்தா அஞ்சுகிறாராம்.