தப்பியது 'இண்டிகோ' விமானம் அமெரிக்காவின் ஜார்ஜியா மாகாணத்தில் உள்ள திபிலிசியில் இருந்து, டில்லிக்கு நேற்று அதிகாலை 3:00 மணிக்கு புறப்பட்ட இண்டிகோ விமானம், ஈரான் வான்வெளி மூடப்படுவதற்கு சில நிமிடங்களுக்கு முன் அப்பகுதியை கடந்து வந்தது. ஈரானிய வான்வெளியில் இருந்த ஈரான் அல்லாத பதிவெண் கொண்ட கடைசி பயணியர் விமானம் இதுவாக இருக்கலாம் என கூறப்படுகிறது. இதை தொடர்ந்து, மற்ற விமானங்கள் தங்களின் வழித்தடத்தை மாற்றியமைத்தன; சில விமானங்கள் ரத்து செய்யப்பட்டன. கடந்த ஆண்டு ஜூனில், இஸ்ரேலுக்கு எதிரான 12 நாள் போரின் போதும், இஸ்ரேல் - -ஹமாஸ் போரின் போதும், இஸ்ரேலுடன் துப்பாக்கி சண்டை நடத்தியபோதும் ஈரான் வான்வெளியை மூடியிருந்தது. ஈரான் வான்வெளி, கிழக்கு - மேற்கு நோக்கி அமைந்துள்ளதால், 'லுப்தான்சா' போன்ற பல சர்வதேச விமான நிறுவனங்களின் சேவைகளும் பாதிக்கப்பட்டுள்ளன.

இந்தியர்கள் குழு இன்று வருகை ஈரானில் சிக்கியுள்ள 10,000க்கும் மேற்பட்ட இந்தியர்கள், கிடைக்கும் வழியை பயன்படுத்தி அங்கிருந்து வெளியேறும்படி மத்திய அரசு சமீபத்தில் அறிவுறுத்தியது. அதேசமயம், அங்கு சிக்கியுள்ளவர்களை மீட்கும் பணியும் மேற்கொள்ளப்பட்டது. அங்குள்ள இந்திய துாதரக அதிகாரிகள், ஈரானில் வசித்து வரும் இந்தியர்களை கணக்கெடுக்கும் பணியில் ஈடுபட்டுள்ளனர். போராட்டம் காரணமாக, பல்வேறு இடங்களில் தகவல் தொடர்பு மற்றும் இணைய சேவை துண்டிக்கப்பட்டுள்ளதால், கணக்கெடுக்கும் பணியில் தொய்வு ஏற்பட்டது. பல கட்ட முயற்சிகளுக்கு பின், முதற்கட்டமாக, ஒரு சில இந்தியர்கள் நாடு திரும்ப நடவடிக்கை எடுக்கப்பட்டுள்ளது. அதன்படி, நாடு திரும்ப உள்ள இந்தியர்கள் தங்கள் ஆவணங்களுடன் தயாராக இருக்க துாதரகம் அறிவுறுத்தியது. இந்நிலையில், ஆவணங்களை சமர்ப்பித்த இந்தியர்கள், முதற்கட்டமாக இந்தியா திரும்ப ஏற்பாடு செய்யப்பட்டு உள்ளது. திட்டமிட்டபடி அனைத்து பணிகளும் சரியாக நடக்கும் பட்சத்தில், முதற்கட்ட இந்தியர்கள் குழு இன்று நாடு திரும்பும் என எதிர்பார்க்கப் படுகிறது.