மன் கி பாத் நிகழ்ச்சியில் பிரதமர் மோடி பேசியதாவது: நவம்பர் 26ம் தேதி அரசியலமைப்பு சட்ட தினத்தன்று பார்லியின் மைய அரங்கில் சிறப்பு நிகழ்ச்சி ஒன்று ஏற்பாடு செய்யப்பட்டிருந்தது. தேசிய பாடலான 'வந்தே மாதமரம்' இயற்றப்பட்டு 150வது ஆண்டு நிறைவையொட்டி நாடு முழுவதிலும் நிகழ்ச்சிகள் மிக சிறப்பாக தொடங்கப்பட்டன. நவம்பர் மாதம் 25ம் தேதி அயோத்தியின் ராமர் கோவிலில் காவிக்கொடி ஏற்றப்பட்டது. நவம்பர் மாதம், பல உத்வேகங்களை நமக்குக் கொண்டு வந்திருக்கிறது. இந்தியக் கடற்படையின், நீர்மூழ்கி எதிர்ப்பு கப்பலான மாஹே மும்பையில் நாட்டிற்கு அர்ப்பணிக்கப்பட்டது.

மிகவும் முக்கியம்

காசி தமிழ் சங்கமம் டிச.,2ல் காசி நமோ படித்துறையில் தொடங்குகிறது. இந்தாண்டுக்கான கருப்பொருளாக, 'தமிழ் கற்கலாம்' என்ற மிகவும் சுவாரஸ்யமான தலைப்பு அறிவிக்கப்பட்டுள்ளது. தமிழகத்தில் இருந்து வரும் நமது சகோதர, சகோதரிகளை மகிழ்வோடு வரவேற்கிறேன். இந்த நிகழ்ச்சி, பல தரப்பினரையும் சந்திக்க ஒரு வாய்ப்பாக அமையும். இந்நாளை எதிர்நோக்கி காத்திருக்கிறேன். காசி தமிழ் சங்கமம் என்பது, தமிழ் மொழியை விரும்பும் அனைவருக்கும் மிகவும் முக்கியமான ஒன்றாக உள்ளது.

தமிழ் கலாசாரம் உயர்வானது. தமிழ் மொழி சிறப்பானது. தமிழ் மொழி இந்தியாவின் பெருமிதம்.

புதிய சாதனை

தேன் உற்பத்தியில் இந்தியா புதிய சாதனைகளை படைத்து வருவதாக பிரதமர் கூறினார். கடந்த 11 ஆண்டுகளில் நாட்டில் தேன் உற்பத்தி இரு மடங்காக அதிகரித்துள்ளது. கடந்த சில ஆண்டுகளில் தேன் ஏற்றுமதியும் மூன்று மடங்கிற்கும் மேலாக உயர்ந்துள்ளது. தேன் உற்பத்தி இயக்க திட்டத்தின் கீழ், காதி கிராமோத்யாக் சார்பில் 2.25 லட்சத்திற்கும் மேற்பட்ட தேனீ பெட்டிகள் மக்களுக்கு வினியோகம் செய்யப்பட்டுள்ளன. இது ஆயிரக்கணக்கான மக்களுக்கு புதிய வேலை வாய்ப்புகளை வழங்கியுள்ளது. சில நாட்களுக்கு முன்பு, ஹைதராபாத்தில் உலகின் மிகப் பெரிய இன்ஜின் எம்.ஆர்.ஓ வசதியைத் தொடக்கி வைத்தேன்.

பெரிய மைல்கல்

357 மில்லியன் டன் உணவு தானிய உற்பத்தியில் இந்தியா ஒரு வரலாற்று சாதனை படைத்துள்ளது. விவசாய துறையில் இது பெரிய மைல்கல். 10 ஆண்டுகளுக்கு முன்பு, இருந்ததை விட இந்தியாவின் உணவு தானிய உற்பத்தி 100 மில்லியன் டன் அதிகரித்துள்ளது. கடந்த வாரம் மும்பையில் ஐஎன்எஸ் மாஹே இந்திய கடற்படையில் சேர்க்கப்பட்டது. விளையாட்டு துறையில், உலகில் இந்தியா மற்றொரு குறிப்பிடத்தக்க மைல்கல்லை எட்டவுள்ளது. காமன்வெல்த் விளையாட்டு போட்டிகளை இந்தியா நடத்தும் என்று அவிக்கப்பட்டது. இந்த சாதனைகள் தேசத்திற்கும், நாட்டு மக்களுக்கும் சொந்தமானது.

ஜி20 மாநாட்டில்….!

உள்ளூர் உற்பத்தி பொருட்களுக்கு முன்னுரிமை அளிக்க வேண்டும் என்பதை நான் எப்போதும் உங்கள் அனைவரையும் கேட்டுக்கொள்கிறேன். சில நாட்களுக்கு முன்பு, ஜி-20 உச்சிமாநாட்டின் போது, ​​பல உலகத் தலைவர்களுக்கு பரிசுகளை வழங்கும்போது, ​​இதை தான் வலியுறுத்தினேன். நாட்டு மக்களின் சார்பாக உலகத் தலைவர்களுக்கு நான் வழங்கிய பரிசுகள் இதனை தான் அடிப்படையாக கொண்டு இருந்தது. ஜி20 மாநாட்டின் போது, ​​தென் ஆப்ரிக்காவின் அதிபருக்கு நடராஜரின் வெண்கல சிலையை நான் பரிசளித்தேன். இது தமிழகத்தின் தஞ்சாவூரின் கலாசார பாரம்பரியத்தில் வேரூன்றிய சோழர் கால கைவினைத்திறனை பிரதிபலித்தது.

மிகவும் பெருமை

பெண்கள் அணி பார்வையற்றோர் கிரிக்கெட் உலகக் கோப்பையை வென்றது. குறிப்பிடத்தக்க விஷயம் என்னவென்றால், ஒரு போட்டியில் கூட தோல்வியடையாமல், இந்த போட்டியை வென்று சாதனை படைத்தது. இந்த அணியின் ஒவ்வொரு வீராங்கனைகளை நினைத்தும் நாட்டு மக்கள் மிகவும் பெருமைப்படுகிறார்கள்.

இரண்டு நாட்களுக்கு முன்பு, நான் இந்த அணியினரை சந்தித்தேன். உண்மையிலேயே, இந்த அணியின் தைரியமும் ஆர்வமும் நமக்கு நிறைய பாடம் கற்றுக்கொடுக்கிறது. இந்த வெற்றி வரலாற்றில் மிகப்பெரிய ஒன்றாகும், இது ஒவ்வொரு இந்தியரையும் தொடர்ந்து ஊக்குவிக்கும்.

புதிய அனுபவம்

ஒவ்வொரு மாதமும் உங்களைச் சந்திப்பது எனக்கு எப்போதும் ஒரு புதிய அனுபவமாக இருக்கிறது. அடுத்த மாதம் நாம் சந்திக்கும் போது, ​​2025ம் ஆண்டு முடிவுக்கு வரும். நாட்டின் பெரும்பாலான பகுதிகளில் குளிர் இப்போது தீவிரமடையும். குளிர்காலத்தில் உங்களையும் உங்கள் குடும்பத்தினரையும் சிறப்பு கவனத்துடன் கவனித்துக் கொள்ளுங்கள். அடுத்த மாதம், நிச்சயமாக சில புதிய தலைப்புகள் மற்றும் புதிய ஆளுமைகளைப் பற்றி பேசுகிறேன். மிக்க நன்றி. இவ்வாறு பிரதமர் மோடி பேசினார்.