பீஹாரின் முக்கிய கட்சியான ராஷ்ட்ரீய ஜனதா தளத்தை நிறுவிய லாலு பிரசாத் யாதவ், அங்கு 1990 - 1997 வரை முதல்வராக இருந்துள்ளார்.

மத்தியில், காங்கிரஸ் தலைமையிலான ஐக்கிய முற்போக்கு கூட்டணி ஆட்சியில், மறைந்த முன்னாள் பிரதமர் மன்மோகன் சிங்கின் அமைச்சரவையில், 2004 - 2009 வரை ரயில்வே அமைச்சராகவும் இருந்துள்ளார்.

புனரமைப்பு பணி

ஊழல் புகாரில் சிக்கி, லாலு பதவி இழந்த நிலையில், அவரின் மனைவி ரப்ரி தேவி முதல்வர் ஆனார்.

லாலு முதல்வராக இருந்த போது, பாட்னாவின் அன்னே மார்க் சாலையில் உள்ள 1ம் எண் வீட்டில் குடியிருந்தார். ரப்ரி முதல்வரானதை அடுத்து, சர்குலர் சாலையில் உள்ள 10ம் எண் இல்லம் ஒதுக்கப்பட்டது.

பின், லாலு குடும்பத்தினர் அனைவரும் இந்த வீட்டிற்கு குடியேறினர். 20 ஆண்டுகளுக்கு மேலாக, அவர்கள் இங்கே வசித்து வருகின்றனர்.

மாநிலத்தில், சமீபத்தில் நடந்து முடிந்த சட்டசபை தேர்தலில், முதல்வர் நிதிஷ் குமாரின் ஐக்கிய ஜனதா தளம் - பா.ஜ., கூட்டணி அமோக வெற்றி பெற்று மீண்டும் ஆட்சியமைத்தது.

முன்னாள் முதல்வர்கள் அரசு ஒதுக்கியுள்ள பங்களாக்களில், தங்கள் ஆயுள் முழுக்க தங்கியிருக்கலாம் என்ற சட்டம் சமீபத்தில் மாநில அரசால் ரத்து செய்யப்பட்டது.

இதைத் தொடர்ந்து, ரப்ரி தேவியை சர்குலர் சாலையில் உள்ள அரசு பங்களாவில் இருந்து காலி செய்யும்படி உத்தரவு பிறப்பிக்கப்பட்டது.

இதையடுத்து, பாட்னாவின் மஹுவாபாக் பகுதியில் உள்ள தங்கள் சொந்த வீட்டிற்கு செல்ல லாலு குடும்பத்தினர் முடிவு செய்துள்ளதாக கூறப்படுகிறது. இதற்காக, அந்த வீட்டை புனரமைக்கும் பணிகள் தற்போது நடந்து வருகின்றன.

அனுமதி மறுப்பு

கடந்த சில ஆண்டுகளாக, உடல்நலம் பாதிக்கப்பட்டுள்ள லாலு பிரசாத்தின் ஆரோக்கியத்துக்கு முக்கியத்துவம் தரும் வகையில், அந்த வீடு புதுப்பிக்கப்பட்டு வருகிறது.

அவர் முதல்வராக இருந்த போது தங்கியிருந்த அன்னே மார்க் வீட்டிலும், சர்குலர் ரோடு வீட்டிலும், அரசியல் சந்திப்பு, கட்சிப் பணிகளுக்கு முக்கியத்துவம் அளிக்கப்பட்டு வந்தது. எந்த நேரமும், அமைச்சர்கள், எம்.எல்.ஏ.,க்கள், கட்சி தொண்டர்கள் வீட்டிற்கு வந்து லாலு மற்றும் ரப்ரி தேவியை சந்திக்கும் வகையில் இருந்தது. புதிய வீட்டில், இவை அனைத்தும் தலைகீழாக மாறியுள்ளது-. குறிப்பாக, கட்சி தொண்டர்களுக்கு அனுமதி மறுக்கப்பட்டுள்ளது.

கவலை

திட்டமிடப்படாத கூட்டங்கள் தவிர்க்க முடிவு செய்யப்பட்டுள்ளது. வீட்டிற்கு வரும் அனைவரும் தீவிர பரிசோதனைக்கு பின்னரே அனுமதிக்க திட்டமிடப்பட்டுள்ளது.

இது, ராஷ்ட்ரீய ஜனதா தள மூத்த தொண்டர்கள் மத்தியில் அதிருப்தியை ஏற்படுத்தியுள்ளது.

லாலுவின் மகனும், எதிர்க்கட்சித் தலைவருமான தேஜஸ்வி வசம் கட்சி இருப்பதாலேயே இந்த மாற்றங்கள் செய்யப் பட்டுள்ளதாக கூறப்படுகிறது.

சமீபத்திய தேர்தலில், ராஷ்ட்ரீய ஜனதா தளம் படுதோல்வியை சந்தித்த நிலையில், அரசியல் ரீதியாக விதிக்கப்பட்டுள்ள கட்டுப்பாடுகள், அக்கட்சியின் செல்வாக்கு மாநிலத்தில் சரிகிறதா என்ற கேள்வியை எழுப்பியுள்ளது.