90 தொகுதிகளை கொண்ட ஹரியானாவில், கடந்த அக்., 5ம் தேதி ஒரே கட்டமாக சட்டசபை தேர்தல் நடைபெற்றது. தேர்தலில் பதிவான ஓட்டுக்கள் இன்று எண்ணப்பட்டன. தேர்தல் களத்தில் இறங்கிய முக்கிய வேட்பாளர்களில் வெற்றி பெற்றது யார்? என்பது குறித்து பார்க்கலாம்.

முதல்வர் நயாப் சிங்

ஹரியானா மாநில முதல்வர் நயாப் சிங் சைனி, பா.ஜ., சார்பில் லத்வா தொகுதியில் போட்டியிட்டார். இவருக்கு வயது 54. இவர் மீது எந்த ஊழல் வழக்குகளும் இல்லை. மக்கள் மத்தியில் செல்வாக்கு அதிகம். இவர், காங்கிரஸ் வேட்பாளரை 16,054 ஓட்டு வித்தியாசத்தில் வீழ்தினார்.

பூபிந்தர் சிங் ஹூடா

ஹரியானா மாநில காங்கிரஸ் தலைவர் பூபிந்தர் சிங் ஹூடா. இவருக்கு வயது 77. இவர் கர்ஹி சாம்ப்லா- கிலோய் தொகுதியில் காங்கிரஸ் சார்பில் போட்டியிட்டார். இவர் 71,465 ஓட்டு வித்தியாசத்தில் வெற்றி பெற்றார்.

அனில் விஜ்

அம்பாலா கன்ட் தொகுதியில் பா.ஜ., சார்பில் அனில் விஜ் போட்டியிட்டார். இவர் நான் கட்சியில் சீனியர் என்றும், நான் வெற்றி பெறுவேன் என்றும் அடிக்கடி கூறி வந்தார். முதலில் இவர் பின் தங்கினாலும் அடுத்தடுத்த சுற்றுகளில் முன்னேறி 7,277 ஓட்டு வித்தியாசத்தில் வெற்றி பெற்றார்.

வினேஷ் போகத் வெற்றி

ஜுலானா தொகுதியில் காங்., கட்சி சார்பில் மல்யுத்த வீராங்கனை வினேஷ் போகத் போட்டியிட்டார்.இவர், ஒலிம்பிக் மல்யுத்த போட்டியில் இருந்து தகுதி நீக்கம் செய்யப்பட்ட நிலையில், ஒட்டுமொத்த நாட்டு மக்களின் கவனத்தை ஈர்த்திருந்தார். இவர் மொத்தம் 65,080 ஓட்டுக்கள் பெற்றுள்ளார். தன்னை எதிர்த்துப் போட்டியிட்ட பா.ஜ., வேட்பாளர் யோகேஷ் குமாரை விட 6,015 ஓட்டுக்கள் அதிகம் பெற்றார்.

ஸ்ருதி சவுத்ரி

சட்டசபை தேர்தலில் தோஷம் தொகுதியில் பா.ஜ., சார்பில் ஸ்ருதி சவுத்ரி போட்டியிட்டார். 48 வயதான இவர் மீதும் எந்த வழக்குகளும் இல்லை. இவர், 14,257 ஓட்டுகள் பெற்று வெற்றி பெற்றார்.

சாவித்ரி ஜிண்டால்

ஹிசார் தொகுதியில், நாட்டின் பணக்காரப் பெண்மணி சாவித்ரி ஜிண்டால் சுயேச்சையாக போட்டியிட்டு 18,941 ஓட்டுகள் வித்தியாசத்தில் வெற்றி பெற்றார்.