நேபாளத்திலிருந்து பெருக்கெடுத்து ஓடிய வெள்ள நீர் கண்டக் நதியில் கலந்து தடுப்பணையை அடைந்ததால் நேற்று முன்தினம் பீஹாரில் தீவிர வெள்ள அபாய எச்சரிக்கை விடுக்கப்பட்டது. நேபாள எல்லையில் உள்ள பீஹாரின் மேற்கு சாம்ப்ரான் மாவட்டத்தின் வால்மீகி நகரில் உள்ள கண்டக் தடுப்பணையில் இருந்து வெளியேற்றப்படும் நீரின் அளவு நேற்று முன்தினம் இரவு 11:00 மணிக்கு 1.50 லட்சம் கன அடியாக இருந்தது.

இது நேற்று காலை 1.04 லட்சம் கன அடியாக குறைந்துள்ளதாக பீஹார் நீர்வளத்துறை தெரிவித்துள்ளது.

இந்நிலையில் நேபாளத்தின் தேவ்காட் பகுதியில் நேற்று முன்தினம் நள்ளிரவில் பெய்த மழை காரணமாக, கண்டக் நதியின் நீர்மட்டம் மீண்டும் உயரத் தொடங்கியதாகவும், ஆனால் நதிக்கரையில் எந்தப் பாதிப்பும் ஏற்படவில்லை எனவும் அதிகாரி ஒருவர் தெரிவித்தார்.

எனினும் நீர்வளத் துறையினர் வெள்ள நிலைமையை தொடர்ந்து கண்காணித்து வருகின்றனர். அதே நேரத்தில் கங்கை நதியிலும் நீர்மட்டம் குறைந்து வந்தாலும் சில இடங்களில் 1 முதல் 2 செ.மீ., அளவுக்கு நீர்மட்டம் உயரும் என்றும் தெரிவித்தனர்.