கிரிமியன் காங்கோ ரத்தக்கசிவு காய்ச்சல் ( சி.சி.ஹச்.எப்.,) காங்கோ காய்ச்சல் என்று பொதுவாக அழைக்கப்படுகிறது.

குஜராத்தின் ஜாம்நகரில் 51 வயது நபர் இந்த காங்கோ காய்ச்சலுக்கு உயிரிழந்தார். 5 ஆண்டுகளில் இந்தியாவில் இந்த வகை காய்ச்சலில் பதிவான முதல் உயிரிழப்பு இதுதான்.

இது கடுமையான வைரஸ். ரத்தக்கசிவு, காய்ச்சல், வெடிப்புகளை ஏற்படுத்துகிறது என்று மருத்துவர்கள் இன்று தெரிவித்தனர்.

இது குறித்து ஜாம்நகர் மருத்துவக் கல்லூரியின் கூடுதல் டீன் டாக்டர் எஸ்.எஸ். சட்டர்ஜி கூறியதாவது:

மோகன்பாய் என அடையாளம் காணப்பட்ட அந்த நபர் கால்நடை வளர்ப்பவர். ஜனவரி 21 அன்று மருத்துவமனையில் அனுமதிக்கப்பட்டு ஜனவரி 27 அன்று சிகிச்சையின் போது இறந்தார்.

அவரது இரத்த மாதிரி புனேவில் உள்ள ஒரு ஆய்வகத்திற்கு அனுப்பப்பட்டது. இது வைரஸ் இருப்பதை உறுதிப்படுத்தியது என்றார்.

சுகாதாரத்துறை அதிகாரிகள் கூறியதாவது:

மோகன்பாயின் மரணத்தைத் தொடர்ந்து, அவரது வீட்டிற்கு அருகிலுள்ள பகுதியில் சுகாதாரத் துறை, கண்காணிப்பை அதிகரித்துள்ளது. மேலும் தொற்று ஏற்படாமல் இருக்க, சுகாதாரத்தைப் பேணுமாறு அவரது குடும்பத்தினருக்கு அறிவுறுத்தி இருக்கிறோம்.

இந்த வைரஸால் பாதிக்கப்பட்ட நோயாளிகளுக்கு காய்ச்சல், தசை வலி, தலைவலி மற்றும் தலைச்சுற்றல் ஏற்படும். தொற்று ஏற்பட்ட இரண்டு முதல் நான்கு நாட்களுக்குப் பிறகு தூக்கமின்மை, மனச்சோர்வு மற்றும் வயிற்று வலி, வாய், தொண்டை மற்றும் தோலில் தடிப்புகள் ஆகியவை பிற அறிகுறிகளாகும்.

உலக சுகாதார அமைப்பு அறிக்கையின்படி,கிரிமியன்-காங்கோ காய்ச்சல் கடுமையான காய்ச்சலை ஏற்படுத்துகிறது. இது 40 சதவீதம் வரை இறப்பு விகிதத்தைக் கொண்டுள்ளது மற்றும் தற்போது தடுப்பூசி இல்லை.

இந்த வைரஸ் முதன்மையாக உண்ணி மற்றும் வீட்டு விலங்குகளிடமிருந்து மக்களுக்குப் பரவுகிறது. இந்த வைரஸால் பாதிக்கப்பட்ட நபர்களின் ரத்தம், சுரப்புகள், உறுப்புகள் அல்லது பிற உடல் திரவங்களுடன் நெருங்கிய தொடர்பு கொள்வதன் மூலமும் மனிதனுக்கு மனிதனுக்கு பரவுகிறது.

இவ்வாறு சுகாதாரத்துறை அதிகாரிகள் கூறினர்.