ஜம்மு - காஷ்மீரின் பஹல்காமில் பாகிஸ்தான் பயங்கரவாதிகள் நடத்திய தாக்குதலில், 26 பேர் கொல்லப்பட்டனர். இதைத் தொடர்ந்து, இந்தியா - பாகிஸ்தான் இடையே போர் மூளும் சூழ்நிலை ஏற்பட்டுள்ளது.

சிந்து நதி நீர் பங்கீடு ஒப்பந்தம் நிறுத்தம், துாதரக உறவு முறிப்பு, விசா நிறுத்தம், இறக்குமதிக்கு தடை என, மத்திய அரசு பல நடவடிக்கைகளை எடுத்து வருகிறது.

அதே நேரத்தில், நம் அண்டை நாடான பாகிஸ்தான், எல்லைக்கு அப்பாலில் இருந்து தொடர்ந்து துப்பாக்கிச் சூடு நடத்துவது, ஏவுகணைகள் சோதனை நடத்துவது போன்றவற்றில் ஈடுபட்டுள்ளது.

தகவல்கள் திருட்டு

மேலும், இந்தியா எந்த நேரத்திலும் தாக்குதல் நடத்தும் என்றும், அணு ஆயுதத்தைப் பயன்படுத்துவோம் என்றும் பாகிஸ்தான் கூறி வருகிறது.

இந்நிலையில், பாகிஸ்தானின் 'சைபர்' குற்றவாளிகள், நம் ராணுவத்தின் இணையதளங்களை குறி வைத்து தாக்குதல் நடத்தியுள்ளனர்.

நம் ராணுவத்தின், ராணுவ இன்ஜினியர் சர்வீசஸ் மற்றும் மனோகர் பரீக்கர் ராணுவ கல்வியியல் மற்றும் பகுப்பாய்வு மையத்தின் இணையதளங்களில் நுழைந்து, தகவல்களை திருடியுள்ளனர்.

இது தொடர்பாக, 'பாகிஸ்தான் சைபர் போர்ஸ்' என்ற அமைப்பு, சமூக வலைதளத்தில் இந்தத் தகவல்களை வெளியிட்டுள்ளது.

இதைத் தவிர, 'ஆர்மர்டு வெகிக்கிள் நிகம் லிமிடெட்' என்ற நம் ராணுவ பொதுத் துறை நிறுவனத்தின் இணையதளத்துக்குள் நுழைந்து, அதை முடக்கவும் முயன்றனர்.

இந்த இணையத் தகவல் திருட்டின் வாயிலாக, 1,600 பயனாளர்களின் தனிப்பட்ட தகவல்களை திருடியுள்ளதாக கூறப்படுகிறது.

அதாவது, அவர்களுடைய தனிப்பட்ட இணைய பயன்பாட்டு அடையாள குறியீடு மற்றும் ரகசிய குறியீடுகளைத் திருடியுள்ளதாக கூறப்படுகிறது.

இதன் வாயிலாக சில முக்கிய ராணுவ தகவல்களை இணையத் திருடர்கள் பெற முடியும் என்று கூறப்படுகிறது.

உரிய நடவடிக்கைகள்

இதற்கிடையே, நம் ராணுவத்தின் அனைத்து இணையதளங்களையும், இணையத் திருடர்களிடம் இருந்து பாதுகாப்பதற்கான உரிய நடவடிக்கைகள் எடுக்கப்பட்டுள்ளதாக, மத்திய அரசு வட்டாரங்கள் தெரிவித்துள்ளன.

இந்நிலையில், சில உள்ளூர் மற்றும் வெளிநாட்டு பத்திரிகைகளின் நிருபர்களை, எல்லை கட்டுப்பாட்டு கோட்டு பகுதிக்கு, பாகிஸ்தான் செய்தி, ஒலிபரப்புத் துறை அமைச்சர் அதாவுல்லாஹ் தரார், நேற்று அழைத்துச் சென்றார்.

''எல்லை கட்டுப்பாட்டு கோட்டை ஒட்டியுள்ள பகுதிகளில், கிராம மக்களே வசிக்கின்றனர். இங்கு பயங்கரவாதிகள் யாரும் இல்லை. இதை நிரூபிக்கவே, நிருபர்களை அழைத்துச் சென்றோம்,'' என, அமைச்சர் அதாவுல்லாஹ் தரார் கூறினார்.