பாலிவுட் திரையுலகின் பழம்பெரும் நடிகர் தர்மேந்திரா. இவர் வயது மூப்பு காரணமாக, உடல்நலக்குறைவு ஏற்பட்டு, மும்பை தனியார் மருத்துவமனையில் சிகிச்சை பெற்றார். குணம் அடைந்து வீடு திரும்பிய அவர், மருத்துவர்களின் தீவிர கண்காணிப்பில் இருந்தார். இந்நிலையில் இன்று மதியம் அவர் (நவ.,24) காலமானார். தர்மேந்திரா 300க்கும் மேற்பட்ட ஹிந்தி படங்களில் நடித்துள்ளார்.

'ஆயி மிலன் கி பேலா', 'பூல் அவுர் பத்தர்', 'ஆயே தின் பஹார் கே', 'சீதா அவுர் கீதா', 'ராஜா ஜானி', 'ஜுக்னு', 'யாதோன் கி பாராத்', 'தோஸ்த்', 'ஷோலே', 'பிரதிக்ஞா', 'சரஸ்', 'தரம் வீர்' போன்ற பல படங்களில் சிறப்பாக நடித்தவர் தர்மேந்திரா. கடைசியாக 2023ல், கரண் ஜோஹர் இயக்கிய 'ராக்கி அவுர் ராணி கி பிரேம் கஹானி' படத்தில் அவர் நடித்து இருந்தார்.

இவரது மறைவு செய்தி பாலிவுட் திரையுலகில் அதிர்ச்சியை ஏற்படுத்தி உள்ளது. இவரது மறைவுக்கு இந்திய திரையுலக பிரபலங்களும், ரசிகர்களும் சமூக வலைத்தளங்கள் வாயிலாக இரங்கல் தெரிவித்து வருகின்றனர்.

யார் இந்த தர்மேந்திரா?

பஞ்சாபின் லூதியானா மாவட்டத்தில் உள்ள நஸ்ராலி என்ற கிராமத்தில் கேவல் கிஷன் சிங் தியோல் மற்றும் சத்வந்த் கவுர் ஆகியோருக்கு டிசம்பர் 8ம் தேதி 1935ம் ஆண்டு தர்மேந்திரா பிறந்தார். தில் பி தேரா ஹம் பி தேரே என்ற காதல் நாடகத்துடன் தனது வாழ்க்கையைத் தொடங்கினார். இந்தப் படத்தை அர்ஜுன் ஹிங்கோரானி இயக்கினார்.

* 1997ம் ஆண்டில், ஹிந்தி சினிமாவுக்கு இவர் செய்த பங்களிப்புக்காக பிலிம்பேர் வாழ்நாள் சாதனையாளர் விருதைப் பெற்றார். வயதான போதிலும், தர்மேந்திரா தொடர்ந்து படங்களில் பணியாற்றினார், மேலும் பல படங்களில் நடித்தார்.

* அவரது வரவிருக்கும் படமான இக்கிஸ்-ஐ, ஸ்ரீராம் ராகவன் இயக்குகிறார். இது டிசம்பர் 25, 2025 அன்று பெரிய திரையில் வெளியிட திட்டமிடப்பட்டுள்ளது.

* தர்மேந்திராவின் முதல் மனைவி பெயர் பிரகாஷ் கவுர். இரண்டாவதாக பிரபல நடிகை ஹேமமாலினியை திருமணம் செய்து கொண்டார். சன்னி தியோல், பாபி தியோல், ஈஷா என மொத்தம் 6 குழந்தைகள் தர்மேந்திராவுக்கு உள்ளனர்.

பாலிவுட் திரையுலகின் பழம்பெரும் நடிகர் தர்மேந்திரா, வயது மூப்பு காரணமாக, உடல்நலக்குறைவு ஏற்பட்டு, இன்று மதியம் (நவ.,24) காலமானார். அவரது மறைவுக்கு பலரும் இரங்கல் தெரிவித்துள்ளனர்.

பிரதமர் மோடி:

தர்மேந்திராவின் மறைவு இந்திய சினிமாவில் ஒரு சகாப்தத்தின் முடிவைக் குறிக்கிறது. அவரது திரைப்பட ஆளுமை, அவர் நடித்த ஒவ்வொரு பாத்திரத்திற்கும் வசீகரத்தையும் ஆழத்தையும் கொண்டு வந்த ஒரு அற்புதமான நடிகர். அவர் மாறுபட்ட வேடங்களில் நடித்த விதம் எண்ணற்ற மக்களின் இதயத்தைத் தொட்டது. தர்மேந்திராவின் எளிமை, பணிவு மற்றும் அரவணைப்புக்காகப் போற்றப்பட்டார். இந்த சோகமான நேரத்தில், எனது எண்ணங்கள் அவரது குடும்பத்தினர், நண்பர்கள் மற்றும் எண்ணற்ற ரசிகர்களுடன் உள்ளன. ஓம் சாந்தி.

என்று பதிவிட்டுள்ளார்.

ஜனாதிபதி திரவுபதி முர்மு:

மூத்த நடிகரும் முன்னாள் நாடாளுமன்ற உறுப்பினருமான தர்மேந்திராவின் மறைவு இந்திய சினிமாவுக்கு ஒரு பெரிய இழப்பாகும். மிகவும் பிரபலமான நடிகர்களில் ஒருவரான அவர், தனது பல்லாண்டு புகழ்பெற்ற வாழ்க்கையில் ஏராளமான மறக்கமுடியாத அர்ப்பணிப்பை வழங்கி உள்ளார்.

இந்திய சினிமாவின் ஒரு உயர்ந்த நபராக, இளம் தலைமுறை கலைஞர்களை தொடர்ந்து ஊக்குவிக்கும் ஒரு பாரம்பரியத்தை விட்டுச் சென்றுள்ளார். அவரது குடும்பத்தினர், நண்பர்கள் மற்றும் ரசிகர்களுக்கு எனது மனமார்ந்த இரங்கலைத் தெரிவித்துக் கொள்கிறேன்.

என்று திரவுபதி முர்மு இரங்கல் தெரிவித்துள்ளார்.

காங்கிரஸ் தலைவர் கார்கே:

இந்தியத் திரையுலகம் இன்று ஒரு மதிப்புமிக்க நடிகரை இழந்துவிட்டது. பிரபல நடிகர் தர்மேந்திரா இப்போது இல்லை. 2012 ஆம் ஆண்டு பத்ம பூஷண் விருது பெற்ற தர்மேந்திரா, பல ஆண்டுகளாக சினிமா ஆர்வலர்களின் இதயங்களில் இடம்பிடித்தார், மேலும் தனது அற்புதமான நடிப்பு மற்றும் எளிமையான வாழ்க்கையால் ஆழமான தோற்றத்தை ஏற்படுத்தினார்.

அவரது மறைவு ஒரு சகாப்தத்தின் முடிவு. அவரது குடும்பத்தினருக்கும் ரசிகர்களுக்கும் எனது ஆழ்ந்த இரங்கல்கள். அவரது ஆன்மா சாந்தியடையட்டும்.

இவ்வாறு மல்லிகார்ஜூன் கார்கே இரங்கலில் பதிவிட்டுள்ளார்.

துணை ஜனாதிபதி சி.பி.ராதாகிருஷ்ணன்:

இந்திய மக்களின் நேசத்துக்குரிய அடையாளமாக இருந்த நடிகர் தர்மேந்திராவின் மறைவு இந்திய சினிமாவுக்கு ஈடுசெய்ய முடியாத இழப்பு என்று துணை ஜனாதிபதி சி.பி.ராதாகிருஷ்ணன் இரங்கல் தெரிவித்துள்ளார்.