அந்த வீடியோவில், ராகுலும், சோனியாவும் அவர்களது தோட்டத்துக்குச் சென்று சிறிய ஆரஞ்சுப் பழங்களை பறித்து கூடையில் நிரப்பினர்.

கூடை நிறைய பழத்தை எடுத்துக்கொண்டு இருவரும் சமையலறைக்கு வருகின்றனர். இருவரும் ஆரஞ்சுப் பழத்தை உரித்து சாறு எடுத்தனர்.

பிரியங்கா யோசனை

பின்னர், ‛‛ இது தங்கை பிரியங்காவின் யோசனை. அவர் சொன்ன சமையல் முறையை பின் பற்றி இந்த ஜாமை நான் தயாரிக்கிறேன்” என்று குறிப்பிடும் ராகுல், அடுப்பில் பாத்திரம் வைத்து சமைக்க ஆரம்பித்தார்.

அப்போது ராகுல், ‛‛ பா.ஜ.,வினருக்கும் ஜாம் கிடைக்கும்” என்று சொல்ல, அதற்கு சோனியா “அவர்கள் இதை நம் மீது எறிந்துவிடுவார்கள்” என்கிறார்.

அதற்கு ராகுல், “அதனால் என்ன, மீண்டும் பழங்களை பறிப்போம்” என்று சொல்லிவிட்டு, இருவரும் சேர்ந்து சிரிக்கின்றனர்.

பிடிக்காத விஷயம்

“ராகுலிடம் எனக்கு பிடிக்காத விஷயம், என்னைப் போலவே அவனும் பிடிவாத குணம் கொண்டவன். ஆனால், அன்பும் அக்கறையும் மிகுந்தவன்” என தன் மகனைப் பற்றி சோனியா புகழ்ந்து பேசுகிறார்.

ஆரஞ்சு ஜாம் தயாரான பிறகு தாயும் மகனும் சேர்ந்து கண்ணாடிக் குடுவைகளில் அதை நிரப்புகின்றனர். அந்தக் குடுவைகளின் மேல், “சோனியா மற்றும் ராகுலிடமிருந்து அன்புடன்...” என்று எழுதப்பட்டுள்ளது.

ராகுலின் யூடியூப் சேனலில் பதிவேற்றம் செய்யப்பட்ட இந்த வீடியோ தற்போது வைரலாகியுள்ளது.