இங்கிலாந்து சுற்றப்பயணம் சென்றுள்ள இந்திய பெண்கள் அணி, டி-20 மற்றும் ஒருநாள் தொடரில் விளையாடி வருகிறது. டி-20 தொடரை 3-2 என்ற கணக்கில் வெற்று இந்திய அணி சாதனை படைத்தது. இந்நிலையில், நேற்று (ஜூலை16) நடந்த முதல் ஒருநாள் போட்டியில், இங்கிலாந்தை (258/6, 50 ஓவர்) 4 விக்கெட் வித்தியாசத்தில் இந்திய அணி (262/6, 48.2 ஓவர்) வீழ்த்தியது.

இந்திய அணியின் துவக்க ஜோடியான ஸ்மிருதி மந்தானா மற்றும் பிரதிகா ராவத், அதிரடியாக விளையாடி 48 ரன்கள் சேர்த்து, புதிய உலக சாதனை படைத்தனர். 12 போட்டிகளில் இந்த ஜோடி, 1000 ரன்களை கடந்துள்ளது. இதில் 9 முறை 50+ ரன்களை இந்த ஜோடி எடுத்துள்ளது. இதில் 4 செஞ்சுரி பார்ட்னர்ஷிப்பும் அடங்கும். இவர்களது சிறந்த பார்ட்னர்ஷிப் 233 ரன்கள் என்பது குறிப்பிடத்தக்கது.

'டாப் 10'ல் மந்தானா!

இப்போட்டியில், அதிரடியாக விளையாடி 28 ரன்கள் குவித்த மந்தானா, ஒருநாள் போட்டியில் 4500 ரன்கள் குவித்த இரண்டாவது இந்திய வீராங்கனை என்ற சாதனை படைத்தார். மேலும் ஒருநாள் போட்டிகளில் அதிக ரன் குவித்த வீராங்கனைகளில், 10வது இடம் பிடித்துள்ளார். இப்பட்டியலில், மிதாலி ராஜ் முதலிடம் வகிக்கிறார். இந்தியாவுக்காக அவர், 7805 ரன்கள் எடுத்துள்ளார்.

யார் ? யார் ?

1. மிதாலி ராஜ் - இந்தியா (7805 ரன்)

2. சார்லட் எட்வர்ட்ஸ் - இங்கி., (5992 ரன்)

3. சுஷி பேட்ஸ் - நியூசி., (5896 ரன்)

4. சாரா டெய்லர் - இங்கி., (5873 ரன்)

5. பெலின்டா கிளார்க் - ஆஸி., (4844 ரன்)

6. கேரன் ரோல்டன் - ஆஸி., (4814 ரன்)

7. எமி சட்டர்யெ்ட் - நியூசி., (4639 ரன்)

8. மேக் லேன்னிங் - ஆஸி., (4602 ரன்)

9. லாரா வால்வர்ட் - தெ.ஆப்ரி., (4519 ரன்)

10. ஸ்மிருதி மந்தானா - இந்தியா (4501 ரன்)