விளை பொருட்களுக்கு குறைந்தபட்ச ஆதரவு விலை, ஓய்வூதியம் உள்ளிட்ட கோரிக்கைகளை வலியுறுத்தி, டில்லி முற்றுகை போராட்டத்தை, பஞ்சாப், ஹரியானா, உ.பி., ஆகிய மாநிலங்களைச் சேர்ந்த விவசாயிகள் நடத்தி வருகின்றனர்.

டில்லியின் எல்லைகள் அடைக்கப்பட்டுள்ளதால், ஹரியானா உடனான பஞ்சாபின் எல்லைகளான ஷம்பு மற்றும் காநவுரி எல்லைகளில் விவசாயிகள் போராடி வருகின்றனர்.

இந்நிலையில், இந்த கோரிக்கைகளை வலியுறுத்தி, ஹரியானாவின் பல்வேறு பகுதிகளில் பாரதிய கிசான் சாருணி என்ற விவசாய சங்கம் சார்பில், நேற்று டிராக்டர் பேரணி நடந்தது.

குருஷேத்ரா, யமுனா நகர், சிர்சா உள்ளிட்ட இடங்களில் நடந்த பேரணிகளில், 150க்கும் மேற்பட்ட டிராக்டர்களில் விவசாயிகள் பங்கேற்றனர்.

இதே போல், பஞ்சாபின் பாட்டியாலாவில் உள்ள முன்னாள் முதல்வர் அமரீந்தர் சிங், அபோஹரில் உள்ள பா.ஜ., மாநில தலைவர் சுனில் ஜாகர், பர்னாலாவில் உள்ள கட்சி மூத்த தலைவர் கேவல் சிங் தில்லான் ஆகியோரின் வீடுகளுக்கு வெளியே, பாரதிய கிசான் ஏக்தா உக்ரஹான் என்ற விவசாய சங்கம் சார்பில் தர்ணா நடந்தது.

மேலும், மாநிலத்தின் 13 மாவட்டங்களில் உள்ள, 21 சுங்கச்சாவடிகளிலும் விவசாயிகள் நேற்று போராட்டம் நடத்தியதால், போக்குவரத்து கடுமையாக பாதிக்கப்பட்டது. இன்றும் போராட்டம் நடத்தவுள்ளதாக அவர்கள் தெரிவித்துள்ளனர்.

இதற்கிடையே, விவசாய சங்கப் பிரதிநிதிகளை மத்திய அமைச்சர்கள் இன்று நான்காவது கட்டமாக சந்தித்து பேச உள்ளனர்.