லோக்சபா தேர்தல் இன்று துவங்கி, ஜூன் 1 வரை ஏழு கட்டங்களாக நடக்கிறது. தமிழகம் உட்பட 21 மாநிலங்கள் மற்றும் யூனியன் பிரதேசங்களில் உள்ள 102 தொகுதிகளில் காலை 7:00 மணிக்கு ஓட்டுப்பதிவு துவங்கியது. மாலை 6:00 மணி வரை ஓட்டுப்பதிவு நடைபெறும்.

பாதுகாப்பு காரணங்களுக்காக ஒரு சில ஓட்டுச்சாவடிகளில் மட்டும், தேர்தல் முடிவடையும் நேரத்தில் மாற்றம் செய்யப்பட்டுள்ளன. மொத்தம், 1.87 லட்சம் ஓட்டுச்சாவடிகள் அமைக்கப்பட்டுள்ளன. 18 லட்சத்துக்கும் மேற்பட்ட பணியாளர்கள் தேர்தல் பணியில் ஈடுபடுத்தப்பட்டு உள்ளனர். 16.63 கோடி வாக்காளர்கள் தங்கள் ஜனநாயக கடமையை இன்று நிறைவேற்ற உள்ளனர்.

தேர்தல் பணியில் ஈடுபடும் பணியாளர்கள், பாதுகாப்பு படையினரின் போக்குவரத்துக்காக 41 ஹெலிகாப்டர்கள், 84 சிறப்பு ரயில்கள், 1 லட்சத்துக்கும் அதிகமான வாகனங்கள் பயன்படுத்தப்படுகின்றன. தேர்தல் கண்காணிப்பு பணிகளில் 361 பார்வையாளர்கள் ஈடுபடுத்தப்படுகின்றனர். 50 சதவீதத்துக்கும் அதிகமான ஓட்டுச்சாவடியில், 'ஆன்லைன்' நேரலை ஒளிபரப்பு செய்யப்பட்டுள்ளன.

லோக்சபா தேர்தலை தவிர, அருணாச்சல பிரதேசம் மற்றும் சிக்கிம் மாநிலங்களில் உள்ள 92 சட்டசபை தொகுதிகளுக்கும் இன்று தேர்தல் நடந்து வருகிறது.