மும்பை:மும்பைத் தாக்குதலில் தொடர்புடைய, முக்கியக் குற்றவாளி அஜ்மல் கசாப்பை விரைவாக தூக்கிலிடக்கோரி, மகாராஷ்டிர சட்டசபையில் சிவசேனா மற்றும் பா.ஜ., எம்.எல்.ஏ.,க்கள் அமளியில் ஈடுபட்டனர்.மகாராஷ்டிர சட்டசபை நேற்று கூடியதும், சிவசேனா, பா.ஜ.,வை சேர்ந்த எம்.எல்.ஏ.,க்கள் மும்பைத் தாக்குதல் குற்றவாளி அஜ்மல் கசாப்பை விரைவாக தூக்கிலிடக் கோரி கோஷம் எழுப்பினர். கசாப்பை உடனடியாக தூக்கிலிட வேண்டும், இல்லையென்றால், பதவியில் இருப்பவர்கள் தங்கள் நாற்காலிகளைக் காலி செய்ய வேண்டும் என்று கூறினர். இதனால், கேள்வி நேரம் பாதிக்கப்பட்டது. தொடர்ந்து அமளி நீடித்ததால், சபாநாயகர் திலீப் வால்சே, அவை நடவடிக்கைகளை, 10 நிமிடங்கள் ஒத்தி வைத்தார். சட்டசபைக்கு வெளியிலும், எதிர்க்கட்சி எம்.எல்.ஏ.,க்கள் தொடர்ந்து கோஷங்களை எழுப்பியபடி இருந்தனர்.