போர்களால் பாதிக்கப்படும் நாடுகளுக்கு யார் உதவுவது ஜி - 7 கூட்டத்தில் மோடி கேள்வி
போர்களால் பாதிக்கப்படும் நாடுகளுக்கு யார் உதவுவது ஜி - 7 கூட்டத்தில் மோடி கேள்வி
ADDED : ஜூன் 18, 2026 04:08 AM

ஈவியான்: ஏதோ இரண்டு நாடுகளுக்கு இடையே நடக்கும் போரால், அதனுடன் தொடர்பில்லாத நாடுகள் பாதிக்கப்படும்போது, அவற்றுக்கு யார் உதவுவது என்று பிரதமர் நரேந்திர மோடி கேள்வி எழுப்பியுள்ளார்.
ஐரோப்பிய நாடான பிரான்சின் ஈவியான நகரில் 'ஜி - 7' அமைப்பின் மாநாட்டில் சிறப்பு அழைப்பாளராக பிரதமர் நரேந்திர மோடி பங்கேற்றார். நேற்று நடந்த கூட்டத்தில் அவர் பேசியதாவது:
மேற்காசியாவில் நான்கு மாதங்களாக நீடித்த போரால், எரிபொருள், உரம், உணவுப் பொருட்கள் என, பலவற்றின் வினியோகத்தில் கடும் பாதிப்பு ஏற்பட்டது. இதில், வளர்ந்து வரும் நாடுகள் பெரும் பாதிப்பை சந்திக்க நேரிட்டன.
ஏதோ இரு நாடுகளுக்கு இடையே நடக்கும் இதுபோன்ற போர், மோதல்களால், சண்டை - சச்சரவுகளால், அதனுடன் தொடர்பு இல்லாத நாடுகள் கடும் பாதிப்பை சந்திக்க நேரிட்டுள்ளன; அதற்கான விலையையும் கொடுக்க நேரிட்டன.
இதுபோன்ற சூழ்நிலைகளில், அதனுடன் தொடர்பில்லாத நாடுகள் சந்திக்கும் பொருளாதார பாதிப்புகள், இழப்புகளை யார் ஈடு செய்வது? இதற்கு சர்வதேச நிதி அமைப்புகள் உதவ முன் வர வேண்டும். அதற்கான வழிமுறைகளை உருவாக்க வேண்டும்.
அதுபோல, நாடுகளுக்கு இடையே வர்த்தகம் மற்றும் தொடர்புகளை உருவாக்கும் வகையில், சர்வதேச அளவில் வழிமுறைகளை உருவாக்க வேண்டும்.
இவ்வாறு அவர் பேசினார்.
