இந்த 21ம் நூற்றாண்டில் தேவைப்படும் பிரதான திறன்களாக 'சாப்ட் ஸ்கில்ஸ்'அதிகளவில் பலராலும் உச்சரிக்கப்படுகிறது. இந்த திறன்கள், பணி இடம் மற்றும் தொழில்களில் வெற்றி பெருவதற்கு மட்டுமின்றி, தனிப்பட்ட வளர்ச்சிக்கும் அவசியமாகிறது.
இங்கே சில முக்கிய 'சாப்ட் ஸ்கில்ஸ்'களை பார்க்கலாம்:
தொடர்பு திறன்:
வாய்மொழியாகவும், எழுத்து மூலமாகவும் தகவல்களை திறம்பட தெரிவிக்கும் திறன். இதில் கவனித்தல், புரிந்துகொள்ளுதல் மற்றும் கருத்துக்களை தெளிவாக விளக்குதல் ஆகியவை அவசியமாகிறது.
குழுவாக பணிபுரிதல்:
பணி இடத்தில் அல்லது எந்த சூழலிலும் குழுவாக மற்றவர்களுடன் திறம்பட செயல்படும் திறன். குழு உறுப்பினர்களின் செயல்பாடுகளை புரிந்துகொள்ளுதல் மற்றும் அவர்களின் முயற்சிகளில் பங்கெடுத்தல் அவசியம். ஒத்துழைத்தல் மற்றும் பிரச்னைகளுக்கு தீர்வு காணுதல் ஆகியவையும் இதில் அடங்கும்.
சிக்கலைத் தீர்க்கும் திறன்:
சிக்கல்களைக் கண்டறிவது, விமர்சன ரீதியாக சிந்திப்பது மற்றும் பயனுள்ள தீர்வுகளைக் கொண்டு வருவது ஆகியவை இதில் அடங்கும். பகுப்பாய்வு சிந்தனை, படைப்பாற்றல் மற்றும் வளம் ஆகியவை இதற்கு தேவைப்படுகின்றன.
நெகிழ்வுடன் செயல்படும் திறன்:
புதிய திறன்களைக் கற்றுக்கொள்ளுதல், புதிய சூழல்கள் அல்லது சவால்களுக்கு ஏற்றவாறு மாற்றியமைத்தல், மாற்றத்திற்கு ஏற்றவாறு நெகிழ்வுடன் செயல்படுதல் ஆகியவை அவசியமாகின்றன.
தலைமைத்துவம்:
ஒரு இலக்கை நோக்கி செயல்பட மற்றவர்களை ஊக்கப்படுத்துதல் மற்றும் வழிநடத்துதல். இதில் முடிவெடுத்தல், பணிகளை சரியானவர்களிடம் ஒப்படைத்தல், குழு உறுப்பினர்களை முறையாக ஊக்கப்படுத்துதல் மற்றும் திட்டங்களை நிர்வகித்தல் ஆகியவை அடங்கும்.
உணர்ச்சி நுண்ணறிவு:
தங்களது உணர்ச்சிகளை நிர்வகித்தல், அத்துடன் மற்றவர்களின் உணர்வுகளைப் புரிந்துகொண்டு, அவர்களுக்குரிய முறையில் புரியவைத்து செயல்பட வைத்தல் ஆகிய திறன்களை குறிக்கிறது. அனுதாபம், சுய விழிப்புணர்வு மற்றும் சமூக திறன்கள் இதில் உள்ளடங்கி உள்ளன.
நேர மேலாண்மை:
இலக்கிற்கு ஏற்ப திட்டமிடுதல், காலக்கெடுவுக்குள் பணிகளை திறம்பட ஒழுங்கமைத்து செயல்படுதல் உட்பட பல்வேறு அம்சங்கள் இதில் அடங்கும்.
ராஜதந்திரம்:
பேச்சுவார்த்தை மற்றும் உரிய நுட்பங்களின் வாயிலாக, கருத்து வேறுபாடுகளை ஆக்கபூர்வமான முறையில் எடுத்துரைத்தல் மற்றும் தீர்வு காணுதல்.
பணி நெறிமுறை:
அர்ப்பணிப்பு, நம்பகத்தன்மை மற்றும் பணியில் நேர்மறையான அணுகுமுறையை வெளிப்படுத்துதல், நேரம் தவறாமை, பொறுப்புணர்ச்சி மற்றும் தரத்தில் உறுதியுடன் இருத்தில் ஆகியவை இதில் அடங்கும்.
இத்தகைய 'சாப்ட் ஸ்கில்ஸ்' மேம்பட தொடர் பயிற்சி, விமர்சனங்களை ஏற்றுக்கொள்ளுதல் மற்றும் வளர்ச்சியை நோக்கிய செயல்பாடு ஆகியவை அவசியமாகின்றன. -சதிஷ்குமார் வெங்கடாசலம்.