பிசியோதெரபி என்பது காயம், வலி அல்லது இயலாமை காரணமாக குறைந்துள்ள உடல் இயக்கத்தைக் கட்டுப்படுத்தி, அதை சீரமைக்கும் ஒரு மருத்துவ துணைத்துறை. உடற்கல்வி பயிற்சி, சிகிச்சை முறைகள், மசாஜ் மற்றும் நவீன சிகிச்சைக் கருவிகளைப் பயன்படுத்தி பிசியோதெரபிஸ்ட்கள் நோயாளிகளின் இயக்க திறனை மேம்படுத்துகின்றனர்.

படிப்புகள்

இளநிலை பிசியோதெரபி படிப்பு பொதுவாக நான்கரை ஆண்டு காலம் கொண்டது. 4 ஆண்டு வகுப்புகள் மற்றும் 6 மாத இன்டர்ன்ஷிப் கொண்டதாகும். இதில் சேர மாணவர்கள் பிளஸ் 2 படிப்பில் உயிரியல், இயற்பியல் மற்றும் வேதியியல் பாடங்களில் தேர்ச்சி பெற்றிருக்க வேண்டும். மேலும், சில பல்கலைக்கழகங்கள் நுழைவுத்தேர்வுகள் மூலமாகவே மாணவர்களை தேர்வு செய்கின்றன.

எம்.எஸ்சி பிசியோதெரபி படிப்பு 2 ஆண்டு முழுநேர படிப்பாகும். இதில் சேர்வதற்கான தகுதியாக, மாணவர்கள் பி.பிடி படிப்பில் குறைந்தபட்சம் 50% மதிப்பெண்களுடன் தேர்ச்சி பெற்றிருக்க வேண்டும். சில கல்வி நிறுவனங்கள் நுழைவுத்தேர்வுகள் அல்லது நேர்காணல் அடிப்படையிலும் சேர்க்கை வழங்குகின்றன.

கற்கும் திறன்கள்

பிசியோதெரபி படிப்பின் மூலம் மாணவர்கள், மனித உடலமைப்பு மற்றும் இயக்கக் கூறுகளின் அறிவியல் புரிதல், காயங்கள் மற்றும் செயலிழப்புகளை மதிப்பீடு செய்யும் திறன், சிகிச்சைத் திட்டங்களை வடிவமைக்கும் திறமை ஆகியவற்றைப் பெறுகின்றனர். அத்துடன், நோயாளிகளுடன் நம்பிக்கையான தொடர்பு ஏற்படுத்தும் தொடர்புத் திறன், கையால் சிகிச்சை அளிக்கும் நடைமுறை நுட்பம், சிகிச்சைக்கருவிகளைப் பயன்படுத்தும் திறன், மற்றும் குழு பணியில் ஈடுபடும் திறன்களும் வளர்க்கப்படுகின்றன.

வேலை வாய்ப்பு

பிசியோதெரபி படிப்பை முடித்தவர்கள் அரசு மற்றும் தனியார் மருத்துவமனைகள், மறுவாழ்வு மையங்கள், ஆர்த்தோபிடிக் மற்றும் நரம்பியல் கிளினிக்குகள், விளையாட்டு மருத்துவ மையங்கள், சிறப்பு தேவையுள்ளோர் புனர்வாழ்வு மையங்கள் மற்றும் வீட்டு பராமரிப்பு சேவைகளில் பிசியோதெரபிஸ்ட் ஆக பணியாற்றலாம். மேலும், சிலர் தனியார் கிளினிக் தொடங்கி சுயதொழில் வாய்ப்புகளையும் பெற முடியும்.

வெளிநாட்டு வேலை வாய்ப்புகள்

பிசியோதெரபி துறையில் பட்டம் பெற்ற நிபுணர்களுக்கு கனடா, ஆஸ்திரேலியா, நியூசிலாந்து, ஐக்கிய அரபு அமீரகம், சிங்கப்பூர், ஐரோப்பிய நாடுகள் போன்ற வெளிநாடுகளில் வேலை வாய்ப்புகள் அதிகம் உள்ளன. இவர்களுக்கு மருத்துவமனைகள், புனர்வாழ்வு மையங்கள், விளையாட்டு அணிகள், வயதானோருக்கான பராமரிப்பு மையங்கள் மற்றும் ஆராய்ச்சி நிறுவனங்களில் வேலை வாய்ப்புகள் கிடைக்கின்றன.

ஆராய்ச்சி மற்றும் மேம்பாடு

பிசியோதெரபி துறையில் ஆராய்ச்சி மற்றும் மேம்பாடு, மனித இயக்கவியல், வலி மேலாண்மை, நவீன சிகிச்சை முறைகள் மற்றும் செயலிழப்பு மீட்பு நுட்பங்களை மேம்படுத்துதல் போன்றவற்றில் கவனம் செலுத்துகிறது. செயற்கை நுண்ணறிவு, தானியங்கி சிகிச்சை கருவிகள், மறுவாழ்வு ரோபாட்டிக்ஸ் போன்ற முன்னேற்றங்களின் வாயிலாக இந்தத் துறை விரைவாக வளர்ந்து வருகிறது.