தேர்வு நேரங்களில் படிப்பதற்காக தூக்கத்தைத் தியாகம் செய்வது மாணவர்களிடையே உள்ள ஒரு பொதுவான பழக்கம். ஆனால், “நன்றாகத் தூங்கினால் தான் படித்தது நினைவில் நிற்கும்” என்று அறிவியல் ஆய்வுகள் கூறுகின்றன.

ஹார்வர்ட் மற்றும் பிற நரம்பியல் ஆய்வுகளின்படி, தூக்கம் என்பது நேர விரயமல்ல, அது மூளையைத் தேர்வுக்குத் தயார்படுத்தும் ஒரு முக்கியமான செயல்முறை.

நாம் விழித்திருக்கும் போது படிக்கும் தகவல்கள் அனைத்தும் மூளையின் 'குறுகிய கால நினைவகத்தில்' தான் சேமிக்கப்படுகின்றன. நாம் ஆழ்ந்து தூங்கும் போது தான், மூளையானது இந்தத் தகவல்களை 'நீண்ட கால நினைவகத்திற்கு' மாற்றுகிறது.

மாணவர்கள், இரவு முழுவதும் கண் விழித்துப் படித்தால், படித்த தகவல்கள் மூளையில் நிரந்தரமாகப் பதியாது. தூங்கும் போதுதான் மூளை, படித்த பாடங்களை ஒழுங்குபடுத்தி, தேர்வு அறையில் நினைவுபடுத்திக்கொள்ளும் வகையில் சேமிக்கிறது.

தேர்வு அறையில் அமர்ந்திருக்கும் போது கேள்விகளைப் புரிந்துகொள்வதற்கும், சரியான விடையை எழுதுவதற்கும் கூர்மையான கவனம் தேவை. ஆனால், குறைவான தூக்கம் மூளையின் செயல்பாட்டைக் குறைக்கிறது. இதனால், கேள்வியை தவறாகப் புரிந்துகொள்வது அல்லது தெரிந்த விடையைக் கூட மறந்துவிடுவது போன்ற தவறுகள் நடக்க வாய்ப்புள்ளது.

பகல் முழுவதும் செயல்படும் போது, மூளையில் சில நச்சுப் பொருட்கள் சேர்கின்றன. தூக்கத்தின் போது மட்டுமே செயல்படும் 'கிளிம்பாட்டிக் சிஸ்டம்' என்ற அமைப்பு, இந்த நச்சுக்களை மூளையிலிருந்து வெளியேற்றுகிறது. சரியாகத் தூங்காவிட்டால், இந்த நச்சுக்கள் மூளையிலேயே தங்கி, சோர்வையும் மனக்குழப்பத்தையும் உண்டாக்கும்.

தேர்வு நேரத்தில் வரும் பதற்றம் மற்றும் மன அழுத்தத்தைக் கட்டுப்படுத்தத் தூக்கம் அவசியம். தூக்கமின்மை நம்மை எரிச்சலடையச் செய்வதோடு, நம்பிக்கையையும் குறைக்கிறது. 7 முதல் 8 மணி நேரத் தூக்கம் மனதை அமைதியாக வைத்துக்கொள்ள உதவுகிறது.

மேலும், பதின்ம வயது மாணவர்கள் குறைந்தது 8 முதல் 9 மணி நேரம் தூங்க வேண்டும் என்று மருத்துவர்கள் பரிந்துரைக்கின்றனர். தேர்வுக்கு முந்தைய நாள் இரவு முழுவதும் விழித்திருப்பதை விட, முன்கூட்டியே படித்துவிட்டு இரவில் நன்றாகத் தூங்குவதே அதிக மதிப்பெண் பெற உதவும்.

மேலும், தூங்குவதற்கு ஒரு மணி நேரத்திற்கு முன்பு மொபைல் அல்லது கணினியைப் பயன்படுத்துவதைத் தவிர்க்கவும். இதிலிருந்து வரும் வெளிச்சம் தூக்கத்தைக் கெடுக்கும்.

பாடங்களை படிப்பது எவ்வளவு முக்கியமோ, படித்ததை மூளையில் பதிய வைக்க தூங்குவதும் அவசியம். எனவே மாணவர்கள் தூங்குவதற்கான நேரத்தையும் அவர்களது அட்டவணையில் சேர்ப்பது அவசியம்.