சென்னை:
நம் நாளிதழ் செய்தியை தொடர்ந்து, ஆதிதிராவிடர் நல விடுதிகளில், வார இறுதி நாட்களில், 'வார்டன்' மற்றும் சமையலர்களுக்கு, 'பயோமெட்ரிக்' பதிவு கட்டாயமாக்கப்பட்டு உள்ளது.

ஆதிதிராவிடர் நல விடுதிகளில், சனி, ஞாயிறு வார இறுதி நாட்களில், சமையலர்கள் சமைக்க மறுப்பதுடன், மாணவர்களை கட்டாயமாக வீட்டுக்கு செல்லும்படி வற்புறுத்தி வருகின்றனர். இது குறித்து, நம் நாளிதழில், கடந்த 27ம் தேதி செய்தி வெளியானது.

இதையடுத்து, ஆதிதிராவிடர் நல விடுதிகளில், வார இறுதி நாட்களில் சமையலர்கள் மற்றும் வார்டன்கள் கட்டாயம் பணிக்கு வர வேண்டும் என்றும், சமையல் பணியில் ஈடுபட வேண்டும் என்றும், அரசு உத்தரவிட்டுள்ளது.

இதுகுறித்து, ஆதிதிராவிடர் நலத் துறை அதிகாரிகள் கூறியதாவது:


பொதுவாக வார இறுதி நாட்களில், ஆதிதிராவிடர் நல விடுதிகள் மட்டுமின்றி, பிற விடுதிகளிலும் மாணவர்கள் எண்ணிக்கை குறைவது வழக்கம். அப்போது, விடுதியில் தங்கியுள்ள மாணவர்களின் எண்ணிக்கைக்கு ஏற்ப, சமையலர் அல்லது உதவியாளர்கள் பணிக்கு வருவர்.

ஆனால், இனி வரும் நாட்களில், சமையலர் மற்றும் விடுதி காப்பாளர்கள் கட்டாயம் விடுதியில் தங்கி, மாணவர்களுக்கு மூன்று வேளை உணவு வழங்குவதை உறுதி செய்ய உத்தரவிட்டுள்ளோம்.

மேலும், வார்டன் மற்றும் சமையலர் வருகையை, வார இறுதி நாட்களில் உறுதி செய்யும் வகையில், அவர்கள் கட்டாயம் இரண்டு முறை, 'பயோமெட்ரிக்' கருவியில் பதிவு செய்ய வேண்டும். அதேபோல், மாணவர்கள் காலை, மதியம், மாலை என, மூன்று முறை பதிவு செய்ய வேண்டும்.

மாறாக, சமையல் செய்ய மறுப்பதுடன், மாணவர்களை வெளியேறும்படி வற்புறுத்தும் சமையலர் மற்றும் வார்டன்களை பணிநீக்கம் செய்ய முடிவு செய்துள்ளோம்.

இவ்வாறு அவர்கள் கூறினர்.