இன்றைய நவீன வணிக உலகில், ஒரு நிறுவனம் ஒரு பொருளைத் தயாரிப்பதற்கு முன்பே, மக்கள் அதை விரும்புவார்களா? அதன் விலை எவ்வளவு இருக்க வேண்டும்? யாரிடம் அந்தப் பொருளைக் கொண்டு சேர்க்க வேண்டும்? போன்ற பல கேள்விகளுக்கு விடை தேட வேண்டியுள்ளது. இந்த வினாக்களுக்குப் பின்னால் இருக்கும் மூளையாகச் செயல்படுபவர்களே 'சந்தை ஆராய்ச்சி ஆய்வாளர்கள்'.

ஒரு சந்தை ஆராய்ச்சி ஆய்வாளர் என்பவர் நுகர்வோரின் விருப்பங்கள், சந்தை நிலவரம் மற்றும் போட்டியாளர்களின் செயல்பாடுகளைத் தரவுகள் மூலம் ஆய்வு செய்பவர். நிறுவனங்கள் லாபகரமாக இயங்கவும், சரியான முடிவுகளை எடுக்கவும் உதவுகிறார். ஒரு நிறுவனம் தனது தயாரிப்புகளைச் சரியாகத் திட்டமிட்டு விற்பனை செய்வதற்குத் தேவையான முதுகெலும்பாகச் செயல்படுகிறார்.

முதலாவதாக, வாடிக்கையாளர்களின் தேவைகள் மற்றும் விருப்பங்களை அறிந்துகொள்ளக் கருத்துக்கணிப்புகள், நேர்காணல்கள் மற்றும் குழு விவாதங்கள் வாயிலாக விரிவான தரவுகளைச் சேகரிக்கின்றனர்.

இரண்டாவதாக, அவ்வாறு சேகரிக்கப்பட்ட தரவுகளைப் புள்ளியியல் மென்பொருள்களைக் கொண்டு நுணுக்கமாகப் பகுப்பாய்வு செய்து, சந்தையில் நிலவும் தற்போதைய மாற்றங்கள் மற்றும் எதிர்காலப் போக்குகளைக் கண்டறிகின்றனர்.

இறுதியாக, தாங்கள் கண்டறிந்த சிக்கலான தகவல்களைப் புரியும் வகையில் வரைபடங்கள் மற்றும் அட்டவணைகள் மூலம் ஒரு தெளிவான அறிக்கையாகத் தயாரித்து, நிறுவனத்தின் மேலாளர்களுக்குத் தேவையான ஆலோசனைகளை வழங்குகின்றனர். இதன் மூலம் ஒரு நிறுவனம் தனது வணிக முடிவுகளைத் தரவுகளின் அடிப்படையில் மிகச் சரியாக எடுக்க முடிகிறது.

தேவைப்படும் திறன்கள்


மாணவர்கள் பிளஸ் 2 முடித்த பிறகு இத்துறையை தேர்ந்தெடுக்க விரும்பினால், முதலில் மார்க்கெட்டிங், புள்ளியியல், பொருளாதாரம் அல்லது வணிக மேலாண்மை போன்ற துறைகளில் ஏதேனும் ஒரு இளநிலை பட்டத்தைப் பெறுவது அவசியம்.

இந்தப் படிப்பின் போதே, தரவுகளைச் சேகரிக்கும் முறைகள், நுகர்வோர் மனோபாவத்தைப் புரிந்துகொள்ளுதல் மற்றும் சிக்கலான எண்களைக் கையாளுதல் போன்ற திறன்களை வளர்த்துக்கொள்ள வேண்டும். குறிப்பாக, மைக்ரோசாப்ட் எக்ஸெல், எஸ்.கியூ.எல்., மற்றும் புள்ளியியல் மென்பொருள்களான எஸ்.பி.எஸ்.எஸ்., போன்ற தொழில்நுட்பக் கருவிகளில் நிபுணத்துவம் பெறுவது இத்துறையில் காலூன்ற மிகவும் உதவும்.

வெறும் படிப்புடன் நிறுத்திவிடாமல், கல்லூரி காலத்திலேயே முன்னணி விளம்பர அல்லது சந்தை ஆராய்ச்சி நிறுவனங்களில் 'இன்டர்ன்ஷிப்' செய்வதன் மூலம் நேரடித் தொழில்முறை அனுபவத்தைப் பெறலாம். மேலும், எம்.பி.ஏ., (மார்க்கெட்டிங்) போன்ற முதுகலை படிப்புகள் அல்லது சர்வதேச அங்கீகாரம் பெற்ற சான்றிதழ் படிப்புகளை மேற்கொள்வது, தரவு பகுப்பாய்வு முதல் நிறுவனத்தின் முக்கிய முடிவுகளை எடுக்கும் மேலாண்மை நிலைக்கு உயர்த்தி, ஒரு கௌரவமான மற்றும் அதிக ஊதியம் தரும் பணியைப் பெற்றுத் தரும்.

சந்தை ஆராய்ச்சி ஆய்வாளர்களுக்கு இ-காமர்ஸ், மென்பொருள் நிறுவனங்கள், மருந்து உற்பத்தித் துறை என அனைத்துப் பிரிவுகளிலும் அதிகத் தேவை உள்ளது.

ஆரம்ப நிலையில் ஒரு நல்ல ஊதியத்துடன் தொடங்கும் இந்தப் பணி, அனுபவம் கூடக் கூட மிக உயர்ந்த வருமானம் ஈட்டித் தரும் ஒரு கவுரவமான பணியாகும். ஆராய்ச்சி செய்வதிலும், தரவுகளைக் கையாளுவதிலும் ஆர்வம் உள்ள மாணவர்களுக்கு இது ஒரு பொற்காலமாகும்.