உளவியல் என்பது வெறும் மனநலம் சார்ந்தது மட்டுமல்ல, அது மனித வாழ்க்கையின் ஒவ்வொரு அங்கத்திலும் ஊடுருவியுள்ளது. இன்றைய வேகமான உலகில் மன ஆரோக்கியம் மற்றும் மனித செயல்பாடுகளை புரிந்து கொள்வது மிகவும் அவசியம். ஆகையால், மாணவர்கள் உளவியல் துறை சார்ந்த படிப்பை தேர்வு செய்யும் முன் அதன் பல்வேறு பிரிவுகளை பற்றித் அறிந்துகொள்ள வேண்டும்.

கிளினிக்கல் சைக்காலஜி

உளவியல் துறையிலேயே மிகவும் பிரபலமான பிரிவு. இதில் மனநலக் குறைபாடுகள், உணர்ச்சி ரீதியான சிக்கல்கள் மற்றும் நடத்தை மாற்றங்களைக் கண்டறிந்து அவற்றுக்கு சிகிச்சை அளிப்பது பற்றி கற்றுக்கொள்ளலாம். மருத்துவமனைகள் மற்றும் மனநல மையங்களில் ஆலோசகர் பணி வாய்ப்புகள் உள்ளன.

கவுன்சிலிங் சைக்காலஜி

தினசரி வாழ்க்கையில் ஏற்படும் மன அழுத்தம், குடும்பப் பிரச்சனைகள் அல்லது வேலை தொடர்பான சிக்கல்களைச் சமாளிக்க மக்களுக்கு உதவுவதே இந்தப் பிரிவின் நோக்கம். இத்துறையில் பயிலும் மாணவர்கள், தனிப்பட்ட ஆலோசகராகவோ அல்லது தொண்டு நிறுவனங்களிலோ பணியாற்றலாம்.

எஜுகேஷனல் சைக்காலஜி

மாணவர்கள் எவ்வாறு கற்கிறார்கள், கற்றலில் அவர்களுக்கு ஏற்படும் தடைகள் என்ன என்பதை இந்தப் பிரிவு ஆராய்கிறது. பள்ளிகள் மற்றும் கல்லூரிகளில் மாணவர்களின் கல்வித் தரத்தை மேம்படுத்த இது உதவுகிறது. பள்ளி ஆலோசகர் அல்லது கல்வி ஆலோசகராகப் பணிபுரியலாம்.

இண்டஸ்ட்ரியல் மற்றும் ஆர்கனைசேஷனல் சைக்காலஜி

பெரிய நிறுவனங்களில் வேலை செய்யும் ஊழியர்களின் மனநிலை மற்றும் உற்பத்தித் திறனை மேம்படுத்த இந்தப் பிரிவு பயன்படுகிறது. ஊழியர்களைத் தேர்ந்தெடுப்பது, அவர்களுக்குப் பயிற்சி அளிப்பது மற்றும் பணிச் சூழலை மகிழ்ச்சியாக வைத்திருப்பது இதில் அடங்கும். மனிதவள மேம்பாடு மற்றும் கார்ப்பரேட் நிறுவனங்களில் பணி வாய்ப்புகள் அதிகம்.

டெவலப்மெண்டல் சைக்காலஜி

ஒரு மனிதன் பிறப்பு முதல் இறப்பு வரை உடல் மற்றும் மன ரீதியாக எப்படி வளர்கிறான் என்பதை இந்தப் பிரிவு விளக்குகிறது. குறிப்பாகக் குழந்தைகள் மற்றும் முதியவர்களின் செயல்பாடுகளை ஆராய இது பெரிதும் உதவுகிறது. குழந்தைகள் காப்பகங்கள் மற்றும் சமூக நல அமைப்புகளில் பணியாற்றலாம்.

காக்னிட்டிவ் சைக்காலஜி

நமது மூளை எப்படித் தகவல்களைச் சேமிக்கிறது, நாம் எப்படி முடிவுகளை எடுக்கிறோம் மற்றும் மொழியை எப்படிக் கையாள்கிறோம் என்பது போன்ற விஷயங்களை இது ஆராய்கிறது. ஆராய்ச்சித் துறையில் ஆர்வம் உள்ளவர்களுக்கு இது மிகச்சிறந்த பிரிவு.

பாரன்சிக் சைக்காலஜி

உளவியலும் சட்டமும் இணையும் இடம் இது. குற்றவாளிகளின் மனநிலை, குற்றச் செயல்களுக்கான பின்னணி போன்றவற்றை ஆராய இந்தப் பிரிவு உதவுகிறது. காவல்துறை மற்றும் நீதிமன்றங்களுக்கு உதவியாகப் புலனாய்வுத் துறையில் பணியாற்றலாம்.

ஸ்போர்ட்ஸ் சைக்காலஜி

விளையாட்டு வீரர்கள் தங்களின் இலக்கை அடைய மன ரீதியாகத் தங்களைத் தயார்படுத்திக் கொள்ள இந்தப் பிரிவு உதவுகிறது. தோல்விகளைக் கடந்து வெற்றியை நோக்கிப் பயணிக்க வீரர்களுக்கு ஊக்கமளிக்கிறது. விளையாட்டு அணிகள் மற்றும் தடகள வீரர்களுக்கு மனநலப் பயிற்சியாளராகப் பணியாற்றலாம்.

பயோசைக்காலஜி

நமது உடல் உறுப்புகள், குறிப்பாக மூளை மற்றும் நரம்பு மண்டலம் நமது நடத்தையை எப்படிப் பாதிக்கின்றன என்பதைப் பற்றி இந்தப் பிரிவு விளக்குகிறது. மரபணுக்கள் மற்றும் ஹார்மோன்கள் மனித உணர்வுகளை எப்படி மாற்றுகின்றன என்பதை மாணவர்கள் இதில் விரிவாகக் கற்பார்கள். நரம்பியல் ஆராய்ச்சி மையங்கள் மற்றும் மருந்து நிறுவனங்களில் ஆய்வாளராகப் பணியாற்றலாம்.

சோஷியல் சைக்காலஜி

தனிமனிதர்களின் எண்ணங்கள் மற்றும் செயல்கள் மற்றவர்களால் எப்படிப் பாதிக்கப்படுகின்றன என்பதை இது ஆராய்கிறது. குழு செயல்பாடு, தலைமைப் பண்பு, மற்றும் சமுதாயத்தில் நிலவும் முன்முடிவுகள் ஆகியவற்றை இந்தப் பிரிவு கையாள்கிறது. சந்தை ஆராய்ச்சி, விளம்பர நிறுவனங்கள் மற்றும் அரசு சாரா அமைப்புகளில் பணியாற்றலாம்.

ஹெல்த் சைக்காலஜி

உடல் ஆரோக்கியத்திற்கும் மனநிலைக்கும் உள்ள தொடர்பை இது விளக்குகிறது. நோய்வாய்ப்பட்டவர்கள் மன ரீதியாக எப்படித் தேறுவது மற்றும் ஆரோக்கியமான வாழ்க்கை முறையைப் பின்பற்றுவது எப்படி என்பதை இந்தப் பிரிவு போதிக்கிறது. பொது சுகாதார மையங்கள் மற்றும் வலி நிவாரண சிகிச்சை மையங்களில் ஆலோசகராகப் பணியாற்றலாம்.

கன்ஸ்யூமர் சைக்காலஜி

வாடிக்கையாளர்கள் ஏன் ஒரு குறிப்பிட்ட பொருளை வாங்குகிறார்கள்? விளம்பரங்கள் மக்களை எப்படி ஈர்க்கின்றன? போன்ற வணிகம் சார்ந்த கேள்விகளுக்கு இந்தப் பிரிவு விடை அளிக்கிறது. பெருநிறுவனங்களின் மார்க்கெட்டிங் துறை மற்றும் நுகர்வோர் நடத்தை ஆய்வாளராகப் பணியாற்றலாம்.

ரீஹேபிலிட்டேஷன் சைக்காலஜி

விபத்து அல்லது நோயினால் உடல் ஊனம் மற்றும் நாள்பட்ட பாதிப்புகளுக்கு உள்ளானவர்கள், மீண்டும் இயல்பு வாழ்க்கைக்குத் திரும்ப இந்தப் பிரிவு உதவுகிறது. அவர்களின் மன வலிமையை மேம்படுத்துவதே இதன் முக்கிய நோக்கம். மறுவாழ்வு மையங்கள், முதியோர் இல்லங்கள் மற்றும் சிறப்புப் பள்ளிகளில் பணியாற்றலாம்.