மெட்ரிக் மற்றும் ஆங்கிலோ இந்தியன் மாணவர்கள், ஏற்கனவே செய்முறைத் தேர்வுகளை செய்து வரும் நிலையில், சமச்சீர் கல்வி திட்டத்தின் மூலம் அரசு மற்றும் அரசு உதவி பெறும் பள்ளி மாணவர்களுக்கும் இத்திட்டம் விரிவுபடுத்தப்படுகிறது.

சமச்சீர் கல்வி திட்டம் அமலுக்கு வரும்போது, செய்முறைத் தேர்வுகளை எக்காரணம் கொண்டும் நீக்கக் கூடாது. வேண்டுமானால், அரசு மற்றும் அரசு உதவிபெறும் பள்ளிகளுக்கும் செய்முறைத் தேர்வு திட்டத்தை நீட்டித்துக் கொள்ளுங்கள் என, தனியார் பள்ளிகள் தரப்பில் கருத்து தெரிவித்த நிலையில், அரசு மற்றும் அரசு உதவிபெறும் பள்ளி மாணவர்களுக்கும் செய்முறைத் தேர்வை அமல்படுத்துவதற்கு பள்ளிக் கல்வித்துறை திட்டமிட்டுள்ளது.

அனைத்து மாணவர்களுக்கும் ஒரு பாடத்திற்கு 100 மதிப்பெண் வீதம், ஐந்து பாடங்களுக்கு 500 மதிப்பெண்களுக்கு பொதுத் தேர்வு நடத்தப்படும். தற்போதைய நிலவரப்படி, ஸ்டேட் போர்டு மற்றும், அரசு உதவிபெறும் பள்ளி மாணவர்களின் மொத்த மதிப்பெண் 500ஆகத் தான் உள்ளது. மெட்ரிக் மாணவர்களுக்கு 1,100 மதிப்பெண்களுக்கும், ஆங்கிலோ இந்தியன் பள்ளி மாணவர்களுக்கு 1,000 மதிப் பெண்களுக்கும், ஓ.எஸ்.எல்.சி., மாணவர்களுக்கு 600 மதிப்பெண்களுக்கும் தேர்வுகள் நடத்தி, அதை 500க்கு கணக்கிட்டு மதிப்பெண் வழங்கப்படுகிறது.

சமச்சீர் கல்வி திட்டம் அமலுக்கு வரும்போது, அனைத்து மாணவர்களுக்கும் நேரடியாக 500 மதிப்பெண்களுக்கு தேர்வுகள் நடத்தப்படும். அறிவியல் பாடத்தை பொறுத்தவரை, செய்முறைத் தேர்வுக்கு 30 மதிப்பெண்கள் என்றும் தியரிக்கு 70 மதிப்பெண்கள் என்றும் பிரிக்கப்படும் எனத் தெரிகிறது. இரு பிரிவிலும் குறைந்தபட்ச மதிப்பெண்களும் நிர்ணயிக்கப்பட உள்ளன. பத்தாம் வகுப்பிற்கான சமச்சீர் கல்வி திட்டம், 2011-2012ல் (வரும் கல்வி ஆண்டுக்கு, அடுத்த கல்வியாண்டு) அமலுக்கு வருகிறது என்பது குறிப்பிடத்தக்கது.