நாம் வெகுவாக பயன்படுத்தும் ஜிமெயில், இன்ஸ்டாகிராம், நெட்பிலிக்ஸ் என அனைத்தின் டேட்டாவும் எங்கோ ஒரு மூலையில் உள்ள கணினிகளில் சேமிக்கப்படுகின்றன. இதையே நாம் 'கிளவுட் கம்ப்யூட்டிங்' என்கிறோம். இந்தத் தொழில்நுட்பக் கட்டமைப்பைத் திட்டமிட்டு உருவாக்குபவரே 'கிளவுட் ஆர்கிடெக்ட்'.

பணி முக்கியத்துவம்

ஒரு கட்டடத்தைக் கட்டுவதற்கு முன்பு எப்படி 'ப்ளூ பிரிண்ட்' அவசியமோ, அதே போல் ஒரு நிறுவனத்தின் தரவுகளை இணையத்தில் பாதுகாப்பாகவும், வேகமாகவும் கையாள்வதற்கான தொழில்நுட்ப வரைபடத்தை உருவாக்குபவர் கிளவுட் ஆர்கிடெக்ட். இவர் ஒரு நிறுவனத்தின் மென்பொருள் மற்றும் வன்பொருள் தேவைகளை ஆராய்ந்து, அதற்கேற்ப கிளவுட் கட்டமைப்பை வடிவமைக்கிறார்.

கிளவுட் ஆர்கிடெக்ட்டின் பணி வெறும் தொழில்நுட்பம் சார்ந்தது மட்டுமல்ல; ஒரு நிறுவனத்தின் டிஜிட்டல் முதுகெலும்பை திட்டமிட்டு உருவாக்குவதாகும். முதலில், ஒரு நிறுவனத்தின் தேவைக்கு ஏற்ப பொதுவான கிளவுட், தனிப்பட்ட கிளவுட் அல்லது இவை இரண்டும் கலந்த 'ஹைப்ரிட்' முறைகளில் எது சிறந்தது என்பதைத் தீர்மானிக்கிறார்.

தொடர்ந்து, இணையத்தின் வாயிலாகத் தரவுகளைப் பாதுகாப்பாக சேமிக்கும் முறைகளையும், மென்பொருள்கள் தடையின்றி இயங்குவதற்கான தளங்களையும் நுணுக்கமாக வடிவமைக்கிறார். வெறும் கட்டமைப்போடு நிறுத்திவிடாமல், ஹேக்கர்களிடம் இருந்து நிறுவனத்தின் ரகசிய தகவல்கள் திருடப்படாமல் இருக்க, 'பயர்வால்ஸ்' போன்ற நவீனத் தொழில்நுட்பக் கருவிகளைக் கொண்டு வலுவான பாதுகாப்பு அரண்களையும் உருவாக்குகிறார்.

இறுதியாக, இந்த ஒட்டுமொத்தக் கட்டமைப்பும் எவ்விதத் தொய்வும் இன்றி இயங்குவதை உறுதி செய்யும் வகையில், அவ்வப்போது ஏற்படும் தொழில்நுட்பச் சிக்கல்களைக் கண்டறிந்து சீர்செய்யும் பராமரிப்பு பணிகளையும் இவர் மேற்கொள்கிறார்.

கல்வி தகுதி

இந்த துறையில் நுழைய, முறையான கல்வி மற்றும் தொழில்நுட்பப் பயிற்சி அவசியம். கணினி அறிவியல், தகவல் தொழில்நுட்பம் அல்லது அது சார்ந்த பொறியியல் பிரிவுகளில் இளநிலைப் பட்டம் பெறுவது ஒரு வலுவான அடித்தளத்தை அமைக்கும். ஜாவா, பைதான் போன்ற நவீன கணினி மொழிகளையும், லினக்ஸ் போன்ற இயங்குதளங்களையும் கையாள்வதற்கான தொழில்நுட்பத் திறன்களை வளர்த்துக்கொள்ள வேண்டும்.

மேலும், பட்டப்படிப்போடு நிறுத்திவிடாமல், சர்வதேச அளவில் அங்கீகரிக்கப்பட்ட அமாசான் வெப் சர்வீசஸ் - AWS (Amazon Web Services), மைக்ரோசாப்ட் அசூர் - Microsoft Azure அல்லது கூகுள் கிளவுட் போன்ற சான்றிதழ் படிப்புகளை மேற்கொள்வது, முன்னணி நிறுவனங்களில் வேலைவாய்ப்பைப் பெறுவதை மிக எளிதாக்கும்.

கிளவுட் ஆர்கிடெக்ட் துறையில் நிபுணத்துவத்திற்கு ஏற்ப பல்வேறு வேலைவாய்ப்புகள் உள்ளன. ஆரம்ப நிலையில் ஜூனியர் கிளவுட் இன்ஜினியராகத் தொடங்கி, கட்டமைப்பை நிர்வகிக்கும் கிளவுட் இன்ஜினியர், நெட்வொர்க் இன்ஜினியர், திட்டங்களை வழிநடத்தும் சீனியர் அல்லது பிரின்சிபல் ஆர்கிடெக்ட் என பல நிலைகள் உள்ளன. தொழில்நுட்பத்தின் மீது ஆர்வமும், புதிய விஷயங்களைக் கற்றுக்கொள்ளும் மனப்பக்குவமும் கொண்ட மாணவர்களுக்கு 'கிளவுட் ஆர்கிடெக்ட்' என்பது ஒரு கௌரவமான மற்றும் அதிக வருமானம் ஈட்டித் தரும் துறை.