தஞ்சாவூர்:
“உலகளவில், 135 கோடி மக்கள் நுண்ணுாட்டச்சத்து குறைபாடுகளால் பாதிக்கப்பட்டுள்ளனர்,” என, இந்திய அரசின் உணவுப் பதப்படுத்துதல் தொழில்கள் அமைச்சகத்தின் இணைச்செயலர் ரஞ்சித் சிங் தெரிவித்தார்.

தஞ்சாவூரில் உள்ள தேசிய உணவு தொழில்நுட்ப நிறுவனம், தொழில்முனைவு மற்றும் மேலாண்மை கல்வி நிறுவனத்தில் நடந்த கருத்தரங்கில் பங்கேற்ற அவர் பேசியதாவது:

இந்தியாவின் உணவு அமைப்பின் எதிர்காலத்துக்கு அவசியமான ஊட்டச்சத்து, தொழில்நுட்பம், பரவலான பயன்பாட்டு அளவு, ஆகிய மூன்று முக்கிய அம்சங்களையும் இது ஒன்றிணைக்கிறது.

உணவு செறிவூட்டல் என்பது உணவுப் பொருளில், ஏதேனும் ஒரு நுண் ஊட்டச்சத்தை கூடுதலாகச் சேர்ப்பது மட்டுமல்ல. மாறாக, மக்களின் அன்றாட உணவின் ஒரு பகுதியாக, ஏற்கனவே உள்ள உணவுகள் மூலமாகவே, அத்தியாவசிய ஊட்டச்சத்துகளை, மக்களுக்கு கொண்டு சேர்க்கும் வகையில், அறிவியல் பூர்வமான, பாதுகாப்பான, நிலையான, மலிவான மற்றும் பரவலாகச் செயல்படுத்தக்கூடிய ஒரு விரிவான முறையை உருவாக்குவதே இதன் நோக்கமாகும்.

இந்தியா, உணவு செறிவூட்டலைச் சுற்றி ஒரு குறிப்பிடத்தக்க சூழலமைப்பை உருவாக்கியுள்ளது. இந்திய உணவுப் பாதுகாப்பு மற்றும் தர நிர்ணய ஆணையம், ஒழுங்குமுறை கட்டமைப்பு மற்றும் வரையறுக்கப்பட்ட தரநிலை அளவுகள், உணவு செறிவூட்டலுக்கான அரிசி, கோதுமை மாவு, பால், சமையல் எண்ணெய் மற்றும் இருமுறை செறிவூட்டப்பட்ட உப்பு போன்ற செறிவூட்டப்பட்ட அத்தியாவசியப் பொருட்களுக்கு வழிகாட்டியுள்ளது.

உலகளவில், 135 கோடி மக்கள் நுண்ணுாட்டச்சத்து குறைபாடுகளால் பாதிக்கப்படுகின்றனர். இந்தியாவில் குழந்தைகள், பெண்கள் மற்றும் கர்ப்பிணியரிடம் இரும்புச்சத்து குறைபாடு இன்னும் பரவலாகக் காணப்படுகிறது.

இந்நிலையில், உணவுச் செறிவூட்டல் என்பது குறைந்த செலவில் அதிக மக்களை சென்றடையக்கூடிய திறன்மிக்க பொதுச் சுகாதாரத் தீர்வாகும், உணவுச் செறிவூட்டல் வாயிலாக ஊட்டச்சத்து குறைபாடுகளை மட்டுமல்லாமல், மக்களின் உடல்நலம், கல்வித்திறன், உற்பத்தித்திறன் மற்றும் பொருளாதார முன்னேற்றத்தையும் மேம்படுத்த முடியும்.

மேலும், புதிய ஆராய்ச்சிகள் மற்றும் புதுமையான தொழில்நுட்பங்கள் மூலம் உணவுப் பதப்படுத்துதல் துறையில் நிலையான வளர்ச்சியை உருவாக்க மாணவர்கள் மற்றும் ஆராய்ச்சியாளர்கள் தொடர்ந்து பங்களிக்க வேண்டும்.

இவ்வாறு, அவர் கூறினார்.