சென்னை:
டைம்ஸ் உயர் கல்வி தரவரிசை பட்டியலில், உலகின் முதல் 50 இடங்களில், கோவை அம்ருதா விஸ்வ வித்யாபீடம் பல்கலை இடம் பெற்றுள்ளது.

உலகின் தலைசிறந்த உயர் கல்வி நிறுவனங்களை பட்டியலிடுவதற்கான, 2025 டைம்ஸ் தரவரிசை பட்டியலில், 130 நாடுகளை சேர்ந்த, 2,526 உயர் கல்வி நிறுவனங்கள்பங்கேற்றன. இந்தியாவிலிருந்து, 148 உயர் கல்வி நிறுவனங்கள் பங்கேற்றன. அவற்றில், உலகின் சிறந்த 50 கல்வி நிறுவனங்கள் பட்டியலில், கோவை அம்ருதா விஸ்வ வித்யாபீடம் இடம் பெற்றுள்ளது.

ஐ.நா.,வின் நிலையான வளர்ச்சி இலக்குகள் அடிப்படையில், பல்கலைகளின் முன்னேற்றத்தை, டைம்ஸ் உயர் கல்வி தரவரிசை மதிப்பிடுகிறது. பருவநிலை மாற்றம், தரமான கல்வி, பாலின சமத்துவம், வேலைவாய்ப்பு போன்றவற்றை அடிப்படையாக வைத்து, டைம்ஸ் தரவரிசை பட்டியல் தயாரிக்கப்பட்டுள்ளது.

உலகின் சிறந்த உயர் கல்வி நிறுவனங்களில், அம்ருதா விஸ்வ வித்யாபீடம், 41வது இடத்தை பிடித்துள்ளது.

உலக அளவில் தரமான கல்வி வழங்குவதில், ஐந்தாவது இடம்; பசுமை மின்சாரத்தில் ஆறாவது இடம்; பாலின சமத்துவத்தில் 14வது இடம்; ஆரோக்கியம், நல்வாழ்வில் 29வது இடம்; தொழில், புதுமை மற்றும் உள்கட்டமைப்பில் 63வது இடம்; சுத்தமான குடிநீர், சுகாதாரத்தில் 66வது இடம்; காலநிலை நடவடிக்கையில் 88வது இடத்தை அம்ருதா விஸ்வ வித்யாபீடம் பெற்றுள்ளது.

அம்ருதா விஸ்வ வித்யாபீடம் பல்கலையின் வேந்தர் ஸ்ரீமாதா அம்ருதானந்தமயியின் அன்பு, அறிவியல், சேவை அடிப்படையிலான கண்ணோட்டம் தான் இந்த வெற்றிக்கு காரணம் என, பல்கலை தெரிவித்துள்ளது.