தினமலர்
சினிமா
டிவி
Podcast
iPaper
கோயில்கள்
புத்தகங்கள்
Subscription
திருக்குறள்
கடல் தாமரை
Dinamalar Logo

 

/செய்திகள்/கல்விமலர்/செய்திகள்/தொல்லியல் ஆய்வுகள்: வரலாற்று முக்கியத்துவம் வாய்ந்தது சென்னை

தொல்லியல் ஆய்வுகள்: வரலாற்று முக்கியத்துவம் வாய்ந்தது சென்னை

தொல்லியல் ஆய்வுகள்: வரலாற்று முக்கியத்துவம் வாய்ந்தது சென்னை


UPDATED : ஆக 27, 2013 12:00 AM

ADDED : ஆக 27, 2013 11:24 AM

Follow on GoogleFavourite on Google

UPDATED : ஆக 27, 2013 12:00 AM ADDED : ஆக 27, 2013 11:24 AM


Follow on Google
அ நிறம் | அளவு

சென்னை: "தமிழக தொல்லியல் ஆய்வுகளில், சென்னையில் கண்டெடுக்கப்பட்ட பொருட்கள், வரலாற்று முக்கியத்துவம் வாய்ந்தவை" என, "இன்டாக்"கின், தமிழக குழுத் தலைவர், சுரேஷ் கூறினார்.

சென்னை பல்கலை, பழங்கால வரலாறு மற்றும் தொல்லியல் துறை சார்பில், சென்னை தினம் நேற்று கொண்டாடப்பட்டது. இதில், "இன்டாக்" அமைப்பின், தமிழக குழுத்தலைவர், சுரேஷ் சிறப்பு விருந்தினாரக, கலந்து கொண்டார். துறைத்தலைவர், பாலாஜி தலைமை வகித்தார்.

இதில், சுரேஷ் பேசியதாவது: "தமிழக தொல்லியல் ஆய்வுகளில், சென்னையில் கண்டெடுக்கப்பட்ட பொருட்கள், வரலாற்று முக்கியத்துவம் வாய்ந்தவை. 1863 மே 31ல், சென்னையை அடுத்த பல்லாவரத்தில், ராபர்ட் புரூஸ் புட் அகழாய்வு செய்தார். அடிப்படையில் மண்ணியல் ஆய்வாளரான அவர், தனது துறை தொடர்பாகவே, அகழாய்வு செய்தார்.

அங்கு, வேட்டையாடுவதற்கும், இன்ன பிற காரியங்களுக்கு பயன்படுத்தப்படும், கைக்கோடரி கண்டெடுக்கப்பட்டது. இதுவே, தெற்காசிய ஆய்வுகளில், முதன் முதலில் கண்டெடுக்கப்பட்ட, கைக்கோடாரி ஆகும். ராபர்ட் புரூஸ் புட்டுக்கு, அவருடைய நண்பர் வில்லியம் கிங், துணையாக இருந்தார். பின்னாளில், வில்லியம் கிங்கும் தனியாக தொல்லியல் ஆய்வுகளில், ஈடுபட்டார். அந்த ஊக்கமே, 1880ல், ஆதிச்சநல்லூரில் நடந்த அகழாய்வில், வில்லியம் கிங் ஈடுபட ஊக்கம் கொடுத்தது.

சென்னையில் உள்ள, பல்வேறு இடங்கள், வரலாற்று முக்கியத்துவம் வாய்ந்தவை. குறிப்பாக, மயிலாப்பூர், சாந்தோம், சேத்துப்பட்டு போன்றவை, அதிக முக்கியத்துவம் வாய்ந்த பகுதிகள். 1929ல், கீழ்ப்பாக்கத்தில், பிரெஞ்சுக்காரரின் வீட்டில், பெருங்கற்கால காலத்தைய, பொருட்கள் இருந்தன. தொல்லியல் துறை சார்பில், அலெக்சாண்டர் ரியாவும், அவருடன் ராகவன், ஆராவமுதன் ஆகியோர், அகழாய்வில் ஈடுபட்டனர். அதில், 2,000 ஆண்டுகளுக்கு முந்தைய பல்வேறு பொருட்கள் கிடைத்தன. அங்கு கண்டெடுக்கப்பட்ட முதுமக்கள் தாழி, சென்னை அருங்காட்சியகத்தில் காட்சிக்கு வைக்கப்பட்டுள்ளது.

சென்னையில், புனித ஜார்ஜ் கோட்டை, ஜார்ஜ் டவுன், திருவான்மியூர், மயிலாப்பூர், சிந்தாதிரிப்பேட்டை, பூந்தமல்லி போன்ற இடங்களில், நாணய தொழிற்சாலைகள் இருந்தன. பல இடங்களில், நடமாடும் நாணயத் தொழிற்சாலைகளும் இருந்துள்ளன. இருப்பினும், வடசென்னையில் உள்ள, நாணய தொழிற்சாலை மட்டுமே, பெரும் புகழ் பெற்றது.

கடந்த, 1883ல், சைதாப்பேட்டையில், ரோமானிய நாணயங்கள் கிடைத்தன. குறிப்பாக கிடைத்த இடம் தெரியவில்லை; எனினும், அங்குள்ள, காரணீஸ்வரரர் கோவில் பகுதியில், அந்நாணயங்கள் கிடைத்தன என்ற, யூகமான முடிவுக்கு வரலாம். கடந்த 1979ல், சுதந்திர தினம் கொண்டாடுவதற்காக, திருவான்மியூர் அரசுப் பள்ளியில், பள்ளம் தோண்டும் போது, பல்வேறு வகையான, ரோமானிய நாணயங்கள் கிடைத்தன. அதே போல், புனித ஜார்ஜ் கோட்டையிலும், ஜார்ஜ் டவுனிலும், நாணயங்கள் கண்டெடுக்கப்பட்டன." இவ்வாறு, அவர் கூறினார்.

தினமலர் WhatsApp Channel-ல் சேருங்கள்
Latest Tamil news, instantly on WhatsApp
Follow





      Dinamalar
      Follow us