கல்விக்காக வெளிநாடுகளுக்கு செல்வது என்பது, வேறு ஒரு ஊருக்கு செல்வது போன்று எளிதானதாக மாறிவிட்டது. கல்வி கற்க நாடுகளை தேர்ந்தெடுப்பது ஒரு சில நேரங்களில் ஏமாற்றத்தையும் அளித்துவிடுகிறது. மாணவர்கள் தங்களுக்குத் தெரிந்த விபரங்களை வைத்து நாடுகளையும், மக்களின் பழக்கவழக்கங்களையும் கணிக்கின்றனர். ஆனால் அங்கே சென்ற பிறகு, தங்கள் எண்ணங்களுக்கு மாறானதாக அந்தப் பகுதி இருக்கும் பொழுது படிப்பின் ஆர்வத்தை கூட இழக்கும் நிலைக்கு உள்ளாகின்றனர்.

இந்தியா போன்று பன்முகத் தன்மையை ஒரளவு கொண்ட நாடுகளில் கூட வித்தியாசங்கள் பெரிய அளவில் இருக்கும். நமது நாட்டிலே மாநிலங்களுக்கு மாநிலம் மொழி, கலாச்சாரம் மாறுகிறது என்பது நம் கருத்து. ஆனால் உண்மையில் ஊருக்கு ஊர் இந்த வித்தியாசங்கள் அதிக அளவில் இருக்கின்றன.

எல்லா பகுதிகளும் ஒன்று அல்ல

எடுத்துக்காட்டாக நீலகிரி மாவட்டத்தைப் பற்றி படிப்பவர்கள் தமிழகம் முழுவதும் நீலகிரியைப் போன்று நில அமைப்பு, காலநிலை இருக்கும் என்று நினைப்பதும், சென்னையைப் பற்றிய தகவல்களை அறிந்தவர்கள் தமிழகம் முழுவதும் நெருக்கடியும், தூசியுமாக இருக்கும் என்று கணிப்பதும் மிகவும் தவறான முடிவு என்பது நமக்குத் தெரியும். ஆனால் வெளி தேசத்தவர்களால் ஒரு பெரும் நிலப்பரப்பை ஒரு சில மணி நேரங்களிலோ, ஏன் சில நாட்களிலோ தெரிந்து கொள்வது மிகச் சரியாக இருப்பதற்கான வாய்ப்பு குறைவுதான்.

அதே போன்றுதான் ஒரு நாட்டினைப் பற்றி தெரிந்துகொள்வது என்பதும். நாம் அறிய விரும்பும் நாட்டின் தலை நகரத்தை பற்றியோ அல்லது பொதுவான சுற்றுலாத் தலங்கள் பற்றியோ தெரிந்துகொண்டு தாங்கள் படிக்கச் செல்லும் பல்கலைக்கழகம் இருக்கும் பகுதியும் இது போன்றுதான் இருக்கும் என்று கணிப்பது தவறாகிவிட வாய்ப்புள்ளது.

நாம் படிக்க விரும்பும் பாடத்தை தேர்ந்தெடுத்த பின்னர், அந்த படிப்பிற்கு எந்த நாடுகள் சிறப்பானதாக இருக்கும் என பொருளாதார ரீதியிலும், காலநிலை, கலாச்சாரம் போன்றவை என அனைத்தை பற்றியும் தீவிரமாக ஆராய்ந்து ஒரு தேசத்தினை தேர்வு செய்வது பொதுவாக நடைபெறக்கூடியது.

இணையதளம் மூலம் தெரிந்துகொள்ளுங்கள்

படிக்க விரும்பும் தேசத்தினை பற்றிய அறிமுகங்களை இணையதளத்தின் வாயிலாக தெரிந்து கொள்ளும்போதும், ஏற்கனவே படித்தவர்கள் மூலமாக தகவல்களை அறிந்துகொள்ளும்போதும் குறிப்பிட்ட நாட்டைப் பற்றிய பொதுவான தகவல்களை அறிந்து கொண்ட பின்னர், தான் படிக்க போகும் பல்கலைக்கழகம், தங்குவதற்கான வசதிகள், அந்தப் பகுதியில் நிலவும் காலநிலை, போக்குவரத்து, மருத்துவ வசதிகள் ஆகியவற்றைப் பற்றியும் தெரிந்துகொள்வதில் ஆர்வம் செலுத்துங்கள்.

ஏற்கனவே படித்தவர்கள் உங்களுக்கு தெரியாது என்றால், அந்த நாட்டின் தூதரகம் சென்னையில் இருக்கிறதா என்பதைப் பார்த்து, நேரிலோ அல்லது வேறு பகுதியில் இருந்தால் தொலைபேசி அல்லது மின்னஞ்சல் மூலமாக உங்களின் தனிப்பட்ட சந்தேகங்களுக்கு பதில் பெறுவதற்கு முயற்சி செய்யுங்கள். ஒரு நண்பரிடம் பேசுவதைப் போன்று அனைத்துவிதமான சந்தேகங்களையும் தெளிவாகக் கேளுங்கள், கூச்சம் வேண்டாம்.

மேலும் இணையதளம் மூலமாக தகவல்களை தெரிந்து கொள்ள தேடும்பொழுது பலவிதமான தகவல்கள், மதிப்பீடுகள் உங்களுக்கு கிடைக்கும். அவற்றின் உண்மைத் தன்மையை அவை எந்த மாதிரியான இணையதளத்தில் கொடுக்கப்பட்டிருக்கிறது என்பதை வைத்தும், மேலும் அந்த தகவல்களைச் சார்ந்து தேடும்பொழுதும் கண்டுகொள்ளலாம்.

எந்த பகுதியாக இருந்தாலும் காலநிலையையும், மக்கள் பழக்க வழக்கங்களையும் சரியாக தெரிந்துகொண்டால் மிரட்சியும், கலக்கமும் இன்றி கல்வி எனும் பயணத்தில் சீராக பயணிக்கலாம்.